Tempotimor (Kovalima)-Sesta-feira (10/12/2021) parte madrugada maizumenus tuku 04:41, ema deskoñesidu harahun vidru Sentru Evakuasaun Dezastre (SED) Munisípiu Kovalima ne’ebé lokaliza iha Eskola Sekundáriu Jerál Públika (ESJP) Suai.
Ba Jornalista sira, guarda seguransa SED, Ananias de Araújo katak akontesimentu ema tuda vidru ne’e akontese iha sesta-feira madrugada maizumenus tuku 4:41 otl.
“Horikalan ha’u toba iha ne’e, entaun ohin madrugada tuku 4:41 ema lori fatuk tuda vidru entaun ha’u hakfodak hader sai ba liur ema halai tiha ona, ne’ebe ha’u haree ema barak, se la sala na’in sanulu resin, sira ne’e husi kraik ne’e maka sai mai pois tuda tiha halai fali ba leten parte jalan tol,” dehan Ananias ba jornalista sira iha Salaun ESJP Suai, Sesta (10/12).
Relasiona ho akontesimentu ne’e diretór ESJP Suai, Francelino Freitas Carvalho triste tanba obra ne’ebé furak husi kooperasaun entre ESJP ho MSSI ema deskoñesidu harahun vidru janela nian.
“Ha’u la kontente tanba obra ne’ebé furak liuhusi koperasaun entre ESJP Suai ho MSSI halo, derepente de’it ema deskoñesidu harahun vidru ne’e, depois ami eskola laiha fundus ruma atu troka fali sasan hirak ne’e, ne’ebé ha’u triste tebes,” katak Diretór ne’e.
Diretór eskola ne’e sublina, informasaun ne’ebé iha katak, molok ema tuda rahun vidru SEDMK nian, iha serimónia divertimentu ida iha Aldeia Tali-Oan kona-ba verifikasaun dadus veteranus nian, tanba ne’e deskonfia joven sira fila husi festa refere maka tuda ka harahun vidru janela ne’e.
Ba akontesimentu ne’e parte eskola sei bolu seguransa sira ne’ebé hala’o segura sa iha área refere hodi fó atensaun, nune’e bele fó seguransa di’ak ba patrimóniu estadu nian ne’ebé eziste.
“Iha eskola ne’e guarda na’in rua maka hala’o knaar hodi fo seguransa ba área eskola ne’e, tanba ne’e ha’u sei bolu guarda na’in rua ne’e, hodi fó atensaun hodi nune’e bele fó Seguransa máximu iha eskola refere,” katak Nia.
Relasiona ho ema deskoñesidu tuda eskola parte Polisia Investigasaun seidauk simu informasaun, tanba parte husi eskola seidauk hato’o ba Polísia Nasionál Timor-Leste (PNTL) eskuadra postu no munisípiu.(*)
