Tempotimor (Covalima)-Eletrisidade de Timor-Leste Empreza Públika (EDTL,EP) munisípiu Covalima re-instala kontadór hamutuk rihun 1500 ba kliente sira iha postu administrativu Suai.
Ba Jornalista sira supervizór EDTL,ep munisípiu Covalima, António Mali haktuir, iha suku Beco, postu Suai mak seidauk halo instalasaun, maibé suku seluk remata ona.
“EDTL.EP hahú instala kontador ba klientes hotu, ne’ebé hahú iha Suai Vila mak unidade kontador sira hamutuk 1500 mak ami instala ona, ne’ebé Suai Vila hela suku ida maka seidauk, maibé ohin ami-nia ekipa sei to’o iha ne’ebá,” dehan António ba jornalista sira iha nia knaar fatin, Kuarta (29/12).
Nia afirma, kliente sira ne’ebé halo ligasaun ilegál sei multa dolar Amerikanu $36.00, tanba ne’e durante instala kontador iha postu Suai, EDTL,EP Covalima rekolla reseita balun ba kofre estadu.
“Iha ne’e ami iha sirkular ida katak se maka halo ligasaun ilegál tenke selu $.36.00, ne’ebé duránte ne’e ami rekolla reseitas hamutuk dolar rihun $ 2000.00, ida ne’e husi loron 8 fulan novembru to’o agora ne’e,” Nia esplika.
Entretantu EDTL,EP munisípiu Covalima iha nia funsionáriu permantente hamutuk 17 no kontratádu hamutuk na’in 14, husi totál funsionáriu permantente na’in 17 ne’e, nain 10 hala’o servisu iha Vila no na’in hitu seluk hala’o servisu iha postu administrativu Maukatar, Fatululik, Fohorem, Fatumea, Tilomar, Zumalai no Suai.(*)
