Tempotimor (Covalima)-Sesta-feira (21/01/2022) ne’e Administradór Munisípiu Covalima (AMC), Francisco de Andrade organiza funsionáriu no sosiedade sivíl sira hodi halo limpeza jerál ne’ebé hahú husi Administrasaun Munisípiu Covalima to’o Igreja Avé Maria Suai nia oin.
Tuir administrador munisípiu Covalima katak, objetivu husi limpeza ne’e atu prevene moras denge, tamba moras refere hamate ona ema na’in rua inklui ema na’in 17 mak hetan ona positivu.
“Objetivu limpeza ne’e tanba relatóriu husi saúde mai númeru moras denge ne’e sa’e no hamate ona ema, tanba ne’e ohin loron sesta-feira ne’e funsionáriu kada departamentu sira nomós Sosiedade sivíl sira hotu ne’ebé ezizte iha Covalima sai hotu halo limpeza, nune’e bele prevene moras denge ne’e,” dehan AMC Fransisco iha Administrasaun Covalima, Sesta (21/01).
Iha tempu hanesan aman ba Covalima ne’e husu ba autoridade lokál sira, kada loron sesta atu orgainiza komuniadde hodi halo limpeza ba fatin ne’ebé identifikadu sira hanesan postu Tilomar no Zumalai.
“Fatin ne’ebé identifikadu ona mak Tilomar Salele no postu Zumalai inklui suku Beco ne’e bee nalibun barak, entaun susuk mós barak, tanba ne’e husu autoridade lokál sira atu halo limpeza ba fatin ne’ebé hanesan bee dalan ne’ebé nakonu ho du’ut,” nia hakotu.(*)
