SEFOPE Atribui Sertifikadu Apresiasaun ba Formandu 49 iha ESTV Claret Salele

Formandu 49 simu hela Sertifikadu husi Sekretariu Estadu SEFOPE Alarico do Rosário. kinta (20/01). Foto Tempo Timor

Tempotimor (Covalima)-Kinta-feira (20/01/2022) ohin, Sekretariu Estadu Formasaun Profesionál no Empregu (SEFOPE), Alarico do Rosário entrega serfikadu ba formandu na’in 49 ne’ebé remata ona formasaun iha Eskola Sekundária Tékniku Vokasionál Claret Salele.

Iha seremonia atribuisaun sertifikadu ne’e, Sekretariu Estadu Alarico do Rosário husu ba autoridade munisípiu atu enkoraja joven sira aproveita sentro formasaun sira hodi nune’e iha futuru labele sai bainaka.

Read More

“Lia-menon ba autoridade lokál sira hotu, atu enkoraja juventude sira iha Covalima, oinsa bele aproveita formasaun no eskola, nune’e labele sai bainaka iha futuru mai,” dehan Alarico hafoin atribui sertifikadu ba formandu sira iha ESTV Claret Salele.

Iha biban hanesan, sekretáriu munisípiu Covalima, Fransisco de Jesus Alves husu ba manorin sira atu kontinua transforma matenek ba joven sira tanba formador sira mak lalenok ba foinsa’e sira hodi bele dezenvolve Covalima iha futuru.

“Husu ba profesór no profesora sira atu transfere imi-nia matenek ba estudante sira, tamba imi mak sai lalenok ba foinsa’e sira no sai autór prinsipal nasaun RDTL ne’e sai buras no nabilan,” nia dehan.

Alende ne’e, formandu Costantino Magno da Conceição agradese ba formasaun ne’ebé durante ne’e hetan, tanba bele aumenta kapasidade i hodi bele buka rasik servisu.

“Agradese tebes ba  formadór sira durante ne’e fó formasaun ba ami no formasaun  ne’e importante tebes ba ami, tanba ne’e ba oin ami bele buka rasik servisu ba ami-nia futuru,” nia espresa.

Entertantu formandu sira ne’ebé remata ona iha Eskola Sekundária Tékniku Vokasional Claret Salele ne’e kompostu husi mane na’in 41 no feto hamutuk na’in ualu.(*)

Related posts