Fulan Ida Resin, Inan Faluk Terezinha ho Oan Sira Kesi Destinu ba Kulu ho Nuu

Tempotimor (Covalima)-Maske iha ema nia matan, inan faluk Terezinha Gusmão ho nia oan sira hatudu hamnasa ba ema hotu ne’ebé haleu sira, maibé buat moruk ne’ebé subar hela iha hamnasa nia laran mak destinu ne’ebé besik ona, tanba tempu kulu fuan mós besik hotu ba dadaun.

Hafoin www.tempotimor.com hala’o vizita ba familia refere. Inan faluk Terezinha dehan, durante fulan ida resin ona tenke han de’it kulu tasak ho nuu, hodi aguenta vida, tanba laiha kbi’it atu sosa fos.

Read More

Inan faluk ho kondisaun difisiénsia ne’e subliña, iha tempu dader molok loro-matan sa’e, inan faluk ne’e ho nia oan sira la’o ba buka kulu ho nuu, sorte di’ak hetan, maibé kuandu la hetan dalaruma aguenta moris ho bee durante loron ida tomak, aban mak ba buka fali.

“Durante fulan ida ona, ami han de’it Nu’u ho kulu, ne’ebé loron ha’u ho ha’u-nia oan sira ba kafe laran hodi buka kulu ho nuu, depois fila mai ami han de’it ida ne’e, karik la hetan ami hemu bee de’it, depois ha’u labele halo to’os tanba ha’u uza de’it aintonka, ha’u-nia oan sira mós mesak ki’ik,” dehan Inan faluk Terezinha iha nia rezidénsia, Lela, suku Holpilat postu administrativu Maucatar, Munisípiu Covalima, Sesta (28/01).

Tuir informasaun ne’ebé jornalista www.tempotimor.com asessu husi viziñu sira katak, durante ne’e inan faluk ho kondisaun difisiénsia husu de’it batar no fos iha viziñu sira.

Alende ne’e, hafoi jornalista sira hala’o vizita ba familia ne’e, joven ida ho naran Ferdinandus M. Gusmão husi aldeia Lela apoiu mós fos saku ida ho mina bimoli litru lima ba inan faluk difisiénsia ne’e.

Ho kondisaun ne’e, jornalista sira halo konfirmasaun ho Servisu Solidariedade Sosiál Covalima ne’ebé iha ona rezultadu pozitivu katak, semana oin ekipa Sosiál Covalima sei apoiu aihan báziku ba inan faluk ne’e ho nia oan sira.

Enkuantu inan faluk Tarezina ne’e seidauk hetan nia direitu invalides nian, tanba foin trata dokumentus iha Servisu Solidariedade Sosiál Covalima iha tinan kotuk (2021), maibé fiar katak iha tinan ne’e bele hetan direitu hanesan ho nia maluk sira seluk.

Entretantu inan faluk Terezinha iha oan nain ualu ne’ebé ho idade sei ki’ik hotu, tanba ne’e presiza tebes apoiu husi parte relevante.(*)

Related posts