Komunidade Suku Raimea no Lour Halerik Bee-Moos

Senora Sofia de Carvalho do Nascimento ho nia oan sira hodi karosa ba kuru iha aldeia Hare kain, suku Raimea, Postu Zumalai, Tersa (2/2). Foto Tempo Timor.
Senora Sofia de Carvalho do Nascimento ho nia oan sira hodi karosa atu ba kuru bee iha bee matan. Foto Tempo Timor.

Tempotimor (Covalima)- Komunidade iha suku Raimea no suku Lour, Postu Administrativu Zumalai, Munisípiu Covalima halerik ba bee-moos tanba mákina bee-moos avaria hela.

Reprezentante Komunidade Aldeia Harekain,  Suku Raimea, Sofia de Carvalho do Nascimento, triste ho bee-moos ne’ebé atu asesu defísil tebes.

Read More

“Ami komunidade aldeia Harekain sente triste tebes ba bee-moos tanba durante tinan barak ami kuru de’it bee sumur (bee posu) iha natar laran hodi ba tein no fase roupa,” nia informa ba www.tempotimor, iha Covalima, sesta (05/02.

 Nu’udar feto sente triste tebes ho distansiamentu bee ne’ebé dook tebes halo sira kuru bee uza  motorizada iha tempu dadeersan no lokraik.

“Ami uza karosa no ami tau jerigen 25 hanesan ne’e, ami ba kuru dadeer fila meodia tanba distánsia dook tebes. Loron ida ami kuru dala-rua, dadeer no lokraik,” dehan nia.

Nia hatutan, jerigen 25 ne’e uza ba loron ida de’it tanba labarik barak.

“Dalaruma tempu bailoron ami-nia oan sira la ba eskola ka ba eskola mas tarde, tanba bee arraska,” nia katak.

 Iha sorin seluk, Reprezentante komunidade husi Aldeia Somo Kanua, Suku Lour,  Postu Administrativu Zumalai, Fernanda de Jesus, hateten iha tinan kotuk konsege  asesu bee-moos, maibé la sufisiente no  mákina bee-moos avaria.

 “Ami kuru bee sumur (bee posu) iha natar laran mak lori mai iha estrada hodi karosa tula. Ami husu governu ajuda hadi’a lai ami-nia mákina ne’ebé  aat,” nia husu.

Komunidade área refere informa ona ba problema ne’e xefe suku sira maibé to’o oras ne’e laiha resposta.

“Xefe suku hatán di’ak, imi hein uitoan iha tempu badak sei rezolve maibé to’o agora mákina ne’e seidauk hadi’a,” dehan Fernanda de Jesus.

Hatán ba preokupasaun ne’e, Xefe Suku Raimea Januário Gomes, rekoñese problema ne’ebé komunidade hasoru.

“Loos duni, ha’u-nia komunidade aldeia 3 mak araska duni ba bee-moos. Maibé ita labele hein de’it governu mak bele rezolve ita-nia problema suku laran hanesan mákina bee avaria daudaun ne’e, karik bele ita rasik mak halo kontribuisaun kada uma kain. Ne’e para sosa mákina ne’ebé mak falla. Buat kiik ka boot, ita husu mak governu entaun bainhira mak sira lori mai. Sé bele komunidade sira halo kontribuisaun tanba mákina ne’e fa’an barak loos,” Xefe Suku Januário fó hanoin ba komunidade sira.

Maske nune’e, Xefe Suku Raimea ne’e sei halo karta ba SEFOPE iha Tibar hodi hadi’a mákina ne’e. (*)

Related posts