Tempotimor (Covalima)-Relasiona ho postu observasaun ne’ebé antes ne’e Unidade Patrollamentu Fronteira (UPF) hamutuk ho komunidade Wessei estabelese ona mak dadau ne’e lia-na’in sira husi Wetaba hamutuk ho UPF kompañia Bravo no Falintil Forsa Defeza Timor-Leste (F-FDTL) halo rituál hodi loke dalan ba postu observasaun Wessei.
Tuir reprezentante lia-na’in aldeia Wetaba Manuel da Silva Vicente, objektivu halo rituál ne’e atu loke dalan ba seguransa UPF kompañia Bravo hodi halo patrulhamentu ba postu observasaun Wessei nian.
“Ohin ita halo rituál hanesan ko’a manu hodi halo tuir ritual ne’ebé bei-ala sira rai hela ba ita, entaun ohin ko’a manu nia urat hatudu katak di’ak entaun ita loke dalan ba postu observasaun Wessei di’ak ka aban ita nia membru UPF no komunidade sira halo servisu loke dalan no lere dalan ba to’o postu observasaun Wessei karik la hetan kanek ka moras ruma iha terrenu,” dehan lia-na’in ne’e ba jornalista www.tempotimor.com iha aldeia Wetaba, Domingu (4/4).
Iha fatin hanesan, Inspetór Komandante UPF Kompañia Bravo João Baptista Ferreira katak, UPF ho F-FDTL no Segundu Komandante PNTL munisípiu Covalima ho autoridade lokál no katuas adat sira hotu iha aldeia Wetaba hodi halo rituál atu loke dalan husi Wetaba ba to’o postu observasaun iha Wessei ho di’ak.
“Ha’u ho ha’u-nia segundu komandante PNTL munisípiu Covalima ho komandante F-FDTL ho autoridade lokál no katuas lia-na’in sira hotu iha aldeia Wetaba, suku Biseuk hodi halo kultura atu loke dalan ba loron aban, tanba rai lulik ita tenke halo tuir kultura nian hodi nune’e labele akontese buat ruma, bainhira aban halo servisu iha terrenu, tanba kultura parte seguransa ladun hatene, tanba ne’e ohin ita entrega ba ita-nia katuas adat sira mak halo tuir buat lulik sira, ne’ebé ita ohin akompañia de’it ita-nia katuas adat sira halo lulik no hatudu liuhusi manu nia urat ne’e di’ak, ne’ebé ita agradese ba sira,” dehan nia.(*)
