Tempotimor (Covalima)-Sábadu (04/09/2021) ohin, Unidade Patrollamentu Fronteira (UPF) hamutuk ho Polísia Nasionál Timor-Leste (PNTL) Munisípiu Covalima prende kilat ida ho marka AESE 92 iha uma to’os ida ne’ebé hetan husi veteranu Manuel Barbosa Pina (Mameran) ho ekipa hetan.
Tuir veteranu Mameran, hafoin hetan informasaun katak kilat ho marka AESE 92 subar iha komunidade ida ho naran inisiál FL nia to’os, Mameran ho ekipa halo serku kedas ba fatin refere molok informa ba parte seguransa.
“Horseik (03/09/2021) ha’u telefone direta kedas ba SIP no F-FDTL, entaun sira dehan evidénsia iha mak sira mai atua, maibé ha’u nu’dar rai na’in, Foho-Lulik oan, ha’u atua kedas maibé ha’u la besik kilat ne’e, ha’u hein to’o ohin SIP no Komandante UPF Postu Foho-Lulik mai rega tiha mak foin loke no hatene kilat ne’e, tanba kilat ne’e bele tiru mate karau nomós ema,” dehan veteranu Mameran ba jornalista sira hafoin parte seguransa ba asegura kilat refere iha toos laran, parte Aldeia Foho-Lulik, Sábadu (04/09).
Veteranu ne’e husu ba parte seguransa atu kaptura lalais autór ne’ebé lori kilat ho Ilegál tama Timor-Leste ne’e hodi kontinua ba prosesu investigasaun.
“Hanesan veteranu ida ha’u prontu kontribui no koopera ho polísia para tenki kaptura ema ne’e, tenki kaer, hodi entrega ba polísia para prosesa tuir lei ne’ebé iha,” katak Nia.
Liga situasaun ne’e, Komandante Polísia Munisípiu Covalima, Superintendente Polísia António Maria de Sá katak, autór ba infiltrasaun kilat ne’e detekta ona, tanba ne’e hein hodi halo kapturasaun nune’e bele ba iha prosesu investigasaun hodi identifika autór ho nia ekipa sira.
“Autór ne’e ita deteta ona, no ita sei kaptura kedas nia, hodi deskobre ninia maluk sira seluk no bele halo prosesa tuir lei ne’ebé vigora iha Timor-Leste,” dehan Komandante ne’e.
Komandante mós akresent, parte seguransa nafatin halo operasaun hodi identifika pesoál sira ne’ebé uza sasan korat no kontra lei armas branka.
“Ita seguransa ne’e nafatin halo operasaun, ita nia intelijénsia sira mós la’o hela, ida dadaun ne’e ita deskobre tanba ita-nia maun veteranus sira iha ne’ebá mak halo aproximasaun para sira intrega aan, alende intrega aan sira mós tenki entrega evidensia karik sira lori sasan kroat ruma tenki entrega para ita prosesa sira lori ba tribunal,” Nia dehan.
Enkuantu dadaun ne’e kilat refere iha ona rezidénsia Komandante PNTL nian iha Debos molok entrega ba seksaun investigasaun iha komandu munisípiu Covalima.
“Evidénsia ne’e ha’u asegura, horsida ha’u entrega ba xefe investigasaun para asegura, hodi hein kaptura autór sira ne’e, tanba ne’e kilat manu, la’ós kilat maujer ka kilat seluk, tanba ne’e hein autór ne’e mai ita idetifika loos ninia estatus kona-ba kilat ne’e nia sosa husi se, nia lori mai husi ne’ebé ka nia mesak mak lori ka sei iha ema seluk tan,” nia tenik.
Komandante António komenta katak, kilat manu nian, parte seguransa asegura barak ona, tanba ne’e nia dehan, se de’it mak kaer ka uza kilat tenki entrega ba autoridade seguransa, se lakohi maka bainhira polísia halo operasaun mak hetan sira tenki responsaveliza perante lei ne’ebé kriminiliza ona kilat ba kilat ne’ebé sira utiliza.
Entretantu kilat ne’ebé parte seguransa asegura ona iha Aldeia Foho-Lulik, suku Beiseuk, postu administrativu Tilomar, ho marka AESE 92 ne’ebé kompleta ho bala musan kuaze 30 inklui perdeman suara no asesoris karegadór autormátiku ne’ebé falun metin ho plástiku tabaku nian.(*)
