Tempotimor (Covalima) Sábadu (07/08/2021) Voluntáriu Cruz Vermelha Timor-Leste (CVTL) Filiál Covalima tama-sai uma komunidade nian iha postu administrativu Maucatar hodi desimina informasaun kona-ba Covid-19.
Koordenadór Domingos Gravila Amaral katak, CVTL kontinua suporta Ministra Saúde (MS), hodi desimina informasaun oinsa Komunidade sira bele komprende liután kona-ba prevensaun surtu Covid-19.
“Ida ne’e hanesan programa prevensaun kontinuasaun ba surtu Covid-19 ita fahe informasaun ba komunidade sira iha rurál no iha vila ita tama sai uma hodi fahe panflitu no fahe informasaun ba komunidade hodi kumpri nafatin hodi prevene moras Covid-19 no variante Delta no fase liman ho distansiamentu sosiál,” dehan Domingos ba www.tempotimor.com
Nia afirma, molok ne’e CVTL fahe informasaun Covid-19 nian liuhusi kareta no avizu, maibé komunidade barak ladun komprende husi Avizu, Tamba ne’e CVTL uza maneira Hodi tama sai uma.
“Ami nia voluntáriu CVTL hodi fahe poster Covid-19 hodi tama sai uma no esplika ba komunidade sira, nune’e komunidade sira bele komprende ho di’ak tan kona moras ne’ebe mundu hasoru inklui ita Timor-Leste,” hateten Nia
Entertantu ba oin CVTL sei kontinusaun divulgasaun informasaun kona-ba Covid-19 no moras variante Delta ba komunidade sira iha munisípiu Covalima.(*)
