Tempotimor (Covalima)-Durante fulan tolu ona Banku Nasionál Komérsiu Timor-Leste (BNCTL) halo atendimentu ba kompañia Rafkajaya ladun di’ak, tanba ne’e kompañia konsidera servisu BNCTL lakohi koopera servisu, nune’e kompañia refere husu ona parte relevante atu hare problema hirak ne’e.
Tuir na’in ba kompañia Rafkajaya, Grinaldo de Jesus katak, iha loron kuarta horseik (28/4) importadór sira hein ekipa husi BNCTL durante loron ida tomak, maibé ekipa BNCTL la mosu iha pontu entrada Salele.
“Fulan tolu tui-tuir malu, ami haree BNCTL nia atendimentu ba ami importadór ladun di’ak, ezemplu hanesan horiseik, ema hare data dokumentus no revista sasan sira ne’e hotu ona, maibé hein sira to’o kalan mós sira la mosu mai, tamba ne’e maka ami liu husi ita boot sira hato’o ba parte kompetente oinsa bele hadi’a asuntu ne’e,” dehan Grinaldo ba www.tempotimor.com, Kinta (29/4).
Grinaldo afirma, parte importadór mós kontribu kofre estadu nian, tanba ne’e BNCTL labele halo diskriminasaun iha atendimentu ba kliente sira.
“Ami importadór sira mós kontribui ba estadu, hanesan iha tinan 2020 ne’e ami hatama osan ba kofre estadu hamutuk $94.000 dolar amerikanu, tinan ne’e nian seidauk bele, só to’o fim de anu maka bele fó sai liuhusi relatoriu alfandega ninian,” dehan Nia.
Grinaldo akresenta, bainhira BNCTL atendimentu ba sira kontinua ladi’ak, maka parte kompañia sei hato’o karta ba Ministériu Finansas (MF) atu delega fali kompañia seluk, nune’e labele difikulta kompañia Rafkajaya nia servisu.
“Kuandu sira atende ladi’ak bei-beik, ami sei halo karta ida MF atu nune’e bele foti desizaun hodi delega fali kompañia seluk mai atende ami ho di’ak, nune’e labele difilukta tan ami nia servisu. Tanba dadaun ne’e atendimento husi alfandega la’o normal no maibé parte BNCTL maka la’o falla,” katak Nia.
Entretantu liga ho preokupasaun ne’e, jornalista www.tempotimor.com koko konfirma ho BNCTL Covalima, maibé la konsege hetan tanba okupadu ho servisu seluk. (*)
