La Priense Kriteria, Edukasaun Taka Eskola Bázika Iha Suai

Uma Eskola Bázika Filiál (EBF) ne'ebe lokaliza iha Aldeia Tudulpu, Suku Beco, Postu-administrativu Suai, Munisipiu Covalima. Foto Tempo Timor

Tempotimor (Covalima)- Edukasaun Munisipiu Covalima desidi taka temporaria Eskola Bázika Filiál (EBF) ne’ebe lokaliza iha Aldeia Tudulpu, Suku Beco, Postu-administrativu Suai durante tinan tolu ona, tanba la priense kriteria.

Diretór Edukasaun Munisípiu Covalima, Edmundo Perreira katak, la priense kriteria, tanba alunus la to’o targetu edukasaun nian, entaun EBF Tudulpu muda tha mestri sira ba eskola sentrál Gala.

Read More

“Eskola la taka, só parte edukasaun munisípiu suspende mak atividade eskola, tanba ágora dadaun ne’e estudante la prienxe kritéria, bainhira labarik barak maka eskola ne sei loke fila fali, tanba meza no kadeira hanesan fasilidade eskola nian ne’e sei iha ne’eba hela, ne’ebé eskola la taka,” dehan nia.

Representante komunidade aldeia Tudulpo Jovánio Carvalho Moniz informa, Eskola Bázika Filiál (EBF) Tudulpu abandona ona durante tinan tolu, tanba laiha mestre ka mestra ruma mak atu hanorin iha eskola refere.

“Iha tinan kotuk ami ba hasoru direta diretór Edukasaun Munisípiu Covalima, Nia dehan eskola la taka, taka temporáriu de’it, ne’ebé ami hein to’o agora mós eskola kontinua abandonadu, to’o bainhira mak atu loke eskola ne’e, tanba ami-nia oan sira ba eskola ho distánsia ne’ebé dook tebes, ba to’o sentru Gala kuaze kilometru haat, ne’ebé liuhusi ailaran de’it,” katak komunidade Jovánio ba www.tempotimor.com iha aldeia Tudulpu, Segunda (17/5).

Nia afirma, labarik tinan hitu mai kraik iha aldeia Tudulpo kuaze 30 resin mak abandonadu hela, tanba eskola iha sentru Gala distánsia dook.

“Iha ami-nia aldeia ne’e labarik tinan 7 mai krain kuaze 30 resin mak loron-loron iha uma de’it, na’in haat mak ba eskola iha sentru Gala ne’e mós dok be ba obriga-an de’it, tanba sira tinan hitu ba leten ona, ne’ebé sira la tauk, maibé sira nia alin sira ne’e agora iha uma de’it,” katak nia.

Entertantu eskola bázika filiál Tudulpo dadauk ne’e nakonu ho du’ut inklui animál sira, tanba laiha ema ida atu kuidadu.(*)

Related posts