Tempotimor (Covalima)-Tuir Diretora Jerál Planu Polítika Inklusaun no Impresaun, Odilia Ung Martins katak, lista ne’ebé Servisu Edukasaun Munisípiu Covalima (SEMC) haruka ba Ministériu Edukasaun Juventude no Desportu (MEJD) katak eskola 16 iha Covalima maka tama iha kategória prioridade atu halo konstrusaun no reabilitasaun.
“Ohin ami halo dezaminasaun ba mata dalan projeitu infrastrutura edukativa no projeitu ne’e tama iha kategória Fundus Transferénsia Públika (FTP), ne’ebé orsamentu sei aloka ba eskola sira ne’ebé tama iha lista prioridade atu halo konstrusaun nomós reabilitasaun ba tinan ida ne’e. Orsamentu sira maka sei jere tuir lista ne’ebé husi Munisípiu haruka ba MEJD katak, eskola 16 maka presiza halo konstrusaun nomós reabilitasaun, ne’ebé ami-nia ekipa verifikasaun mós haree katak prezisa tau matan ba eskola hirak ne’e,” katak DJ ne’e ba jornalista sira iha salaun Edukasaun Munisípiu Covalima, Kuarta (01/09).
Prosesu implementasaun kada eskola sei harii estrutura ne’ebé sei involve mós komunidade sira hafoin bele hetan aprovasaun husi Edukasaun Munisípiu Covalima.
“Eskola sira maka sei harii sira nia estrutura, tenke involve mós komunidade sira, maibé labele haree ba familiarizmu, tamba ne’e mai husi komunidade, ne’ebé ami-nia ekipa tékniku sei observa lala’ok sira ne’e,” katak Nia.
Diretora ne’e subliña, orasamentu ba eskola hirak ne’ebé atu halo kontrusaun foun no reabilitasaun ne’e la hanesan, tanba ne’e nia parte seidauk hatene valór fixu ba orasamentu refere.
“Alokasaun orsamentu diferente ba kada eskola, tamba ne’e maka ha’u ladun fixa ninia kuantidade ka totál orsamentu ba 16 projeitus ne’e, tamba eskola balun halo konstrusaun aumenta sala-de-aula, depois casa-de-banho, biblioteka no fasilidade seluk tan,” katak Nia.(*)
