Tempotimor (Covalima)-Tuir administradór munisípiu Covalima, Fransisco de Andrade katak, munisípiu Covalima númeru pozitivu Covid-19 sa’e maka’as, maka autoriedade munisípiu nian hasai sirkulár hodi hapara movimentu komunidade nian durante serka sanitária.
“Enkontru ida ohin ne’e hasai sirkulár ida, tanba agora dadaun Covalima númeru positivu Covid-19 sa’e ona ba 55, tanba ne’e enkontru ohin ne’e atu hapara atividades hotu iha Covalima, hanesan merkadu, fatin públiku sira no sei la autoriza ona sidadaun sira atu ba kapitál Dili,” dehan Fransisco ba www.tempotimor.com, Segunda (17/5).
Iha fatin hanesan, Komandante Polísia Nasionál Timor-Leste (PNTL) munisípiu Covalima, Superintendente António Maria de Sá, hateten parte segunransa iha Munisipiu Covalima ativa fali husi fronteira husi postu ida ba postu no munisipiu Covalima ba munisipiu seluk.
“Oinsá buka solusaun hodi regulariza regra sira , ne’ebé husi ohin ba oin sei la autoriza tan husi munisípiu Covalima ba munísipu seluk no husi postu administrativu sira labele mai munisípiu Covalima, ne’ebé husi parte seguransa pilar tolu hodi halo nia servisu no ekipa taks force ne’ebé forma ona iha suku no aldeia sira, kontinua fahe informasaun iha aldeia no suku sira, hodi komunidade sira hakmatek iha nia fatin,” katak nia.
Entertantu observasaun jornalista www.tempotimor.com iha terrenu nota katak dadaun ne’e iha Covalima kontinua movimentu hanesan baibain.(*)
