Tempotimor (Covalima)-Diretór servisu agrikultura munisípiu Covalima, Zeferino Guterres rekoñese komunidade nia hare iha munisípiu Covalima barak mak estragus, tanba afeita husi irigasaun ne’ebe la diak.
Nia dehan, parte servisu agrikultura halo ona survey, baszeia ba pedidu husi xefe suku sira, maibe laiha operadór atu hadi’a ka dudu bee ba natar.
“Área Suailoro, iha suku rua mak halo halo natar iha ne’ebá hanesan suku Debus no suku Suailoro rasik, entaun iha fulan rua kotuk ita ba survey ona mota Tafara ne’ebé fornese bee ba suku rua, bazeia ba karta husi xefe suku sira,” dehan diretór Zeferino ba www.tempotimor.com iha nia knaar fatin, Segunda (24/5).
Nia afirma, fatin ne’ebé ekipa deside hodi halo survey mak Salore, Akar-laran nomós SuaiLoro, maibé tékniku sira ne’ebé kaer Ekxa iha hela kapitál Dili, entaun labele mai halo bee dalan no ke’e kanu.
Afirma nia, tékniku sira labele mai Covalima, tanba presiza swab inklui trata tan dokumentu viajem nian.
“Agora ita hotu mós hatene, dadaun Covalima serka sanitária hela, entaun sira labele mai, tanba sei swap no hasai Guia de marsa ho razaun hirak ne’e hodi difikulta ba operadór sira ne’ebé mak kaer Ekxa iha ministériu nian labele mai,” dehan Nian.
Entertantu Ekxa dadaun ne’e para hela iha postu administrativu Zumalai, munisipiu Covalima, maibé laiha operadôr atu hadi’a kanu be’e husi mota Tafara Mai to’os nain sira nia natar iha suku Suailoro no Suku Debos. (*)
