Tempotimor (Covalima)-Relasiona ho moras Covid-19 ho nia variante “Delta” ne’ebé dadaun ne’e afeta ona nasaun viziñu indonézia, maka Administradór Munisípiu Covalima (AMC), Fransico de Andrade sei halo sosializasaun ba postu administrativu tolu ne’ebé fronteira ho Indonézia.
Tuir nia, planu atu halo sosializasaun kona-ba variante foun Covid-19 “Delta” ba komunidade sira iha postu administrativu Fatumea, Fatululik no Tilomar iha ona ajenda.
“Ita hotu akompaña iha televisaun katak, moras variante Delta ne’e perigu tebes, agora dadauk iha ona Indonézia, Tamba ne agora dadaun iha ona Planu, Tamba ne’e horiseik hau konfirma ona ho Saude Sira, Tempu badak ami sei halo sosializasaun ba Postu Fronteira ho Indonézia, entaun presiza halo sosializasaun ba postu sira hanesan Fatumea, Fatululik, Tilomar atu nune’e oinsá bele prevene moras ne’e labele tama iha Timor-Leste,” dehan Administradór Francisco de Andrade ba www.tempotimor.com iha nia knaar fatin, Tersa (06/07).
Administradór afirma, atu hapara movimentu transporte ne’ebé tula sasan tama Timor-Leste liu husi fronteira Salele, sei haree ba situasaun, tamba nia impaktu ba povu baibain.
“Atu hapara kareta sira lori sasan mai TL ne’e ita sei haree ba situasaun, tamba se kuandu ita hapara agora ninia impaktu boot ba povu, ne’ebé ita sei haree ba situasaun, se situasaun iha fronteira ne’e maka’as liu entaun ita sei taka,” katak nia.
Entertantu administradór ne’e garantia tanba seguransa iha parte liña fronteira lao di’ak no nia husu komunidade sira iha Covalima liu komunidade iha postu ne’ebé fronteira, atu nafatin kumpri regras Estadu Emerjénsia (EE) nune’e labele halo movimentu ilegál no prevene moras variante Delta tama mai TL.(*)
