Tempotimor (Covalima)-Liga ba desizaun governu ne’ebé atu reativa aula prezensiál iha teritóriu nasionál mak dadaun ne’e estudante no profesór sira hahú ona hakbesik aan ba sentru saúde hodi simu vasina kontra Covid-19.
Maske nune’e, estudante barak iha Eskola Sekundária Jerál Públika (ESGP) Suai labele simu vasina, tanba idade seidauk to’o 18.
“Vasina ne’ebé ami fó ba estudante sira ne’e vasina Sinovax, maibé ami sona de’it estudante ne’ebé ho idade 18 ba leten, depois ami sei haree sira-nia kondisaun molok atu sona,” dehan médika Elvira de Corsilho ba www.tempotimor.com iha ESJP Suai, Kinta (22/07).
Nia afirma, eskola sira ne’ebé ekipa saúde halo ona vasina mak Eskola Sekundária Katólika Avê Maria Suai, ESJP Suai, nomós eskola sira ne’ebé seidauk, ekipa saúde sei esforsu para estudante no prefesór sira ne’ebé tinan 18 ona vasina hotu.
“Ami fo ona vasina ba sira iha Eskola Sekundária Katólika Avê Maria Suai, agora ami mai iha ne’e, depois ami nia ekipa mós ba tiha ona eskola Téknika Akar-Laran, maibé ami sei kobre hotu eskola Sekundária sira iha Covalima,” dehan Nia.
Iha fatin hanesan diretór ESGP Suai, Francelino Freitas Carvalho hatete, estudante ESGP Suai hamutuk rihun 2.175, maibé metade de’it mak simu vasina.
“Estudante ne’ebé atu simu vasina ne’e ita bele dehan metade husi totál estudante 2.175, tamba estudante klasse 10 anu maka la hetan vasinasaun, tamba sira-nia idade ne’e maioria la to’o 18, ne’ebé klasse 11 anu ho 12 anu inklui profesór sira maka tenke simu,” katak Diretór Francelino.
Diretór eskola ne’e husu ba profesór no estudante sira ne’ebé atinji ona idade 18 ba leten atu hakbesik aan ba eskola no sentru saúde suai hodi simu vasina.(*)
