Tempotimor (Covalima)- Tuir koordenadór Cruz Vermelha Timor-Leste (CVTL) Covalima, Domingos Amaral deklara tempu badak CVTL sei apoiu lixeiru ba Ospitál Referál Suai (ORS) inklui apoiu vasinasaun nian ba aldeia no suku sira.
“Iha tempu badak ita sei apoiu fatin soe foer ka Lixu no kona ba vaksina liu-liu ba iha Aldeia no Suku,ita mos presiza atu suporta, no horseik ita reuniaun ho diretór Ospitál Referál Suai, oinsa atu apoiu rekursu umanu ba ORS,” dehan Koordenadór CVTL ba www.tempotimor.com iha nia knaar fatin, Sábadu (07/08).
Nia mós dehan, kona-ba apoiu sira ne’e, Diretór ORS mós molok ne’e hato’o ona pedidu mai CVTL, tanba ne’e tempu badak sei apoiu.
“Ita simu ona pedidu balu husi Diretór ORS mak atu fasilita fatin soe foer (lixu) tamba fatin soe foer barak mak aat ona, ita presiza resposta tempu badak nia laran,” katak Domingos.
Koordenadór ne’e salienta, durante Covid-19 ne’e foer barak mak naklekar iha fatin públiku sira, tanba ne’e CVTL hakarak apoiu fatin publiku hanesan Ospitál Referál Suai.(*)
