Tempotimor (Covalima)-Tinan barak ona mak postu saúde Gala abandonadu nune’e halo komunidade triste no obrigatóriu inan-isin-rua, labarik no komunidade baibain tenke la’o distánsia kilómetru sanulu hodi hetan asinténsia saúde.
Ba kestaun ne’e xefe Aldeia Gala Armando Barreto husu ba Diretór Servisu Saúde Munisípiu Covalima (SSMC) no Ministériu Saúde (MS) atu haree assuntu ne’e ho seriu hodi salva komunidade sira husi virus oioin.
“Postu saúde harii fofoun ne’e sei mai hala’o sira nia servisu hodi atende komunidade sira iha ne’e, Maibé liu tiha tinan ida ho balun, la mai to’o agora, mai konforme sira nia hakarak, ne’ebé ha’u husu ba Diretór Servisu Saúde Covalima nomós Ministériu da Saúde atu haree assuntu ne’e ho sériu, tanba emfermeira no doutor sira nia naran mai atu hala’o servisu hodi atende komunidade iha postu da saúde Gala ne’e, mas ema laiha no ami la hetan oin,” dehan xefe Aldeia ne’e ba www.tempotimor.com iha nia rezidénsia, Domingu (08/07).
Xefe aldeia ne’e mós dehan, komuniade la’ós infrenta de’it parte saúde, maibé to’o agora komunidade sira mós seidauk asesu ba liña eletrisidade.
“Tuir informasaun ne’ebé ha’u rona husi saúde balun katak, aldeia Gala la asesu eletrisidade, tanba ne’e sira enfermeira no doutor sira lakohi mai servisu iha ne’e,” Haktenik nia.
Iha sorin seluk reprezentante komunidade Gala, Joana Moniz Soares husu ba parte relevantes atu tau pesoál saúde permanente iha postu saúde Gala hodi atende inan-isin rua sira.
“Ami nia hakarak ne’e doutor ka parteira ida tenke tau permanente iha postu saúde Gala ne’e, hodi atende ami tanba dook, ne’ebé dala barak ami kondisaun isin-rua atu partus ne’e araska, dalaruma ami hodi kondisaun todan ne’e tenke obriga aan la’o ain ho oras rua ba postu saúde Beco Vila, ka iha ne’ebá mós ladi’ak entaun ami ba liu sentru postu saúde iha Suai hodi partus,” dehan Joana.
Entretantu aldeia Gala hola parte iha suku Suku Beko postu administrativu Suai Munisípiu Covalima ho totál populasaun 395 ne’ebé kompostu husi xefe da família 80.(*)
