Tempotimor (Covalima)-Kuarta-feira (22/09/2021) ohin Sekretáriu Estadu Komunikasaun Sosiál (SEKomS), Merício Juvinal dos Reis “Akara” ho ekipa hala’o audiénsia ho Administradór Munisípiu Covalima (AMC), Francisco de Andrade hodi ko’alia kona-ba oinsa atu harii sentru média iha munisípiu nune’e lalika lori jornalista husi média nasionál ba munisípiu.
“Ita hakarak desentraliza média hodi hamenus kustu prezensa média iha teritóriu tomak se lae buat kiik boot tula hotu média nasionál mak mai, ita prepra transporte no ekipamentu oioin de’it, entau planu ba futuru ita tenke harii sentru média iha munisípiu, nune’e hodi hamenus servisu,” dehan SEKomS, Merício ba jornalista sira iha Rádiu Komunidade Cova Taroman, Kuarta (22/09).
Iha fatin hanesan administradór mós apresia ba SEKomS, tanba vizita ona munisípiu Covalima hodi ko’alia kona-ba asisténsia média nian iha Covalima.
“Apresia tebes ba sekretáriu estadu nia vizita ne’e, hodi ko’alia kona-ba futuru hodi hari sentru ba média sira iha munisípiu Covalima, tanba durante ne’e jornalista na’in haat de’it mak iha munisípiu Covalima durante ne’e kobre informasaun hotu tanba média privadu no média governu menus rekursu hodi halo servisu iha terrenu, ne’ebé ba oin sei tau planu hodi akumula média sira hotu iha Covalima,” katak Nia.
Entretantu SEKomS husu ba média destakadu atu funsiona ho di’ak, nune’e autoridade munisípiu bele asegura tan orsamentu ba média munisípiu sira, nune’e governu sentrál labele fó subsídiu direta ba média sira.(*)
