Tempotimor (Covalima)- Sekretáriu Estadu Komunikasaun Sosiál (SEKomS), Merício Juvinal dos Reis (Akara) apresia ba servisu Rádiu Komunidade Cova Taroman (RCCT) ho nia jornalista sira ne’ebé promove ona povu Covalima nia lian.
“Ha’u-nia prezensa iha ne’e, tanba ráriu komunidade sira husi munisípiu seluk ha’u vizita ona, maibé Rádiu Cova Taroman ne’e seidauk, ne’ebé ha’u mai vizita primeiru, ha’u haree sira funsiona ho di’ak, halo programa talkshow, kobertura no halo programa promosaun la’o ho di’ak,” dehan SEKomS ba jornalista sira iha RCCT, Kuarta (22/09).
Governante ne’e mós dehan, preokupasaun ne’ebé RCCT iha mak kona-ba infraestrutura bázika sira.
“Sira-nia preokupasaun mak infraestrutura, entaun ohin ha’u prezensa iha ne’e hodi vizita no hare kondisaun edifísiu, tanba ha’u simu informasaun katak RCCT Covalima uza fatin rezidénsia administradór munisípiu nian, entaun iha tempu badak husi Ministériu Administrasaun Estatál (MAE) atu reablita ona fatin ne’e, entaun ami mai ho sira-nia Diretór Diresaun Nasionál inkkui reprezentante terras propriedades hodi ko’alia asuntu ne’e,” dehan Akara.
Nia mós promete sei aumenta frekuénsia Rádiu Komunidade Coca Taroman nian hodi nune’e komunidade sira postu to’o suku no aldeia asesu hotu.
“Iha nível tékniku karik bele aumenta frekuénsia nune’e iha postu no suku sira bele asesu programa rádiu streaming liu husi telefone android,” katak Nia.
Iha sorin seluk jestór Rádiu Komunidade Cova Taroman, Sancho Alves Nahack katak, preokupasaun RCCT nian mak kona-ba infraestrutura nomós fasilidade rádiu nian.
“Preokupasaun boot ba ami mak agora dadaun fatin RCCT, tamba tempu badak atu sai husi fatin ne’e, maibé ida ne’e la’ós kestaun ida atu hamate vontade ami-nian, ami kontinua hala’o ami-nia knaar maske servisu ho voluntáriu, jornalista nafatin hala’o programa iha rádiu komunidade,” katak jestór ne’e.
Entretantu servisu na’in sira ne’ebé hala’o knaar iha Rádiu Komunidade Cova Taroman hamutuk na’in 11 ne’ebé kompostu husi kontratadu na’in neen no voluntáriu na’in lima.(*)
