Tempotimor (Covalima)-Komandante Jerál Polísia Nasionál Timor-Leste (PNTL), Komisáriu Faustino da Costa apresia no kongratula ba komandu PNTL munisípiu Covalima tanba membru maioria partisipa iha programa vasinasaun.
“Apresia tebes ba PNTL Covalima, tanba PNTL 100% mak simu vasina, ne’ebé husu ba membru polísia ne’ebé kondisaun saúde la permite atu simu vasina, husu ba membru sira tenke aprezenta sertifikadu husi médiku ba komandu, nune’e sertifikadu mak deklara ema ne’e bele partisipa programa vasina ka lae,” katak Komjer PNTL, liuhusi nia diskursu iha salaun Komandu PNTL Covalima, Tersa (21/09).
Komandante ne’e mós husu ba membru sira ne’ebé seidauk vasina atu partisipa, tanba vasina importante ba saúde públiku.
“Husu nafatin ita-boot sira nafatin partisipa programa nasionál kona-ba vasina, tanba vasina importante tebes ba membrus PNTL hotu, ne’ebé ita-nia governu hamosu rezolusaun ema hotu tenke partisipasaun vasina, ha’u simu relatóriu hatudu rezultadu PNTL maioria partisipa programa vasinasaun, ne’ebé servisu sira ne’ebé ita-boot sira hala’o, hodi estrutura komandu louva ba ita-boot sira nia esforsu, parabéns ba ita-boot sira,” afirma Komisáriu Faustino.
Entertantu Komandante jerál nafatin husu ba membru polísia hotu, atu nafatin hala’o knaar tuir dekretu lei ne’ebé durante ne’e implementa ba eskuadra hotu.(*)
