Tempotimor (Covalima)—Relasiona ho prezensa Membru Governu (MG) sira iha Munisípiu Covalima kona-ba kampaña ka sosializasaun ba vasinasaun kontra Covid-19, maka dadaun ne’e pursentu vasinasaun iha munisípiu Covalima hahú aumenta maka’as no okupa segundu lugar ba pursentu aas.
Tuir xefe departamentu ba programa vasinasaun iha Servisu Saúde Munisípiu Covalima (SSMC), Agapito de Jesus agradese ba membru governu tanba komunidade barak hahú partisipa iha programa vasinasaun.
“Há’u agradese tebes ba membru governu sira-nia prezensa mai iha munisípiu Covalima, tanba rezultadu hatudu katak partisipasaun Komunidade sira ba programa vasinasaun aas tebes hodi aumenta maka’as pursentu vasinasaun iha ita-nia munisípiu, nune’e komunidade ne’ebé simu ona vasina primeira doze 80,4% no segunda doze 51,8%,” dehan Agapito bainhira akompaña Vise Minsitu Edukasaun Juventude no Desportu (MEJD), António Guterres halo sosializasaun iha Aldeia Gazolo, Kinta (14/10).
Agapito akresenta, molok ne’e Komunidade barak maka lakohi vasina tanba maioria fiar informasaun falsu “hoax” ne’ebé espalla iha média sosiál, maibe ho prezensa membru governu sira-nian komunidade barak maka simu ona vasinasaun.
“Uluk hetan ambulánsia balun halai ba to’os, balun taka tan odomatan tanba sira lakohi vasina, entaun agora ne’e ita haree mudansa tanba liuhusi prezensa membru governu sira-nian hodi halo sosializasaun kona-ba vasinasaun nian, komunidade barak maka komesa mai tuir vasina,” dehan Agapito.
Maske nune’e, vise Ministru Edukasaun Juventude no Desportu (MEJD), António Guterres nafatin enkoraja komunidade sira iha Covalima ne’ebe seidauk simu vasina, atu hakat ba sentru saúde sira hodi simu vasina nune’e hasa’e imunidade.
“Imi sira ne’ebé simu ona vasina ne’e tenke ajuda ita-nia xefe suku no xefe aldeia sira, atu nune’e bele hatutan tan informasaun ba komunidade sira ne’ebé seidauk vasina ne’e tenke mai iha sentru saúde hodi hetan vasina, tanba ne’e di’ak ba ita-nia saúde,” katak governante ne’e.
Enkuantu tuir dadus ne’ebé www.tempotimor.com asesu husi portal Ministériu Saúde loron 13 outubro 2021 nian katak, munisípiu Covalima okupa segundu lugar ba vasinasaun, tanba komunidade ne’ebé simu ona vasina doze dahuluk hamutuk rihun 32,354 (80,4%) no segundu doze hamutuk rihun 20,853 (51,8%), maibé ekipa saúde kontinua fó vasina ba komunidade sira, tanba tuir tarjeitu, Covalima presiza atinje rihun 40.228 (100%).
Entertantu membru governu sira ne’ebé hetan responsável hodi hala’o kampaña vasinasaun iha munisípiu Covalima mak hanesan Vise Ministru Edukasaun Juventude no Desportu (vise-MEJD) António Guterres, Minsitru Obras Públika (MOP) Salvadór Pires no Vise Ministru Interiór (Vise-MI) António Armindo.(*)
