Vasina COVID-19: Vise MEJD Kontinua Tama-Sai Área Rural iha Covalima

Vise MEJD, Antonio Guterres Akompana hela pesoal saude sira hodi vasina komuniadde sira iha aldeia Tudulpu. Tersa (19/10). Foto Tempo Timor

Tempotimor (Covalima)-Vise Ministru Edukasaun Juventude no Desportu  (MEJD), António Gutrres kontinua vizita aldeia remotas iha suku Beco, postu Suai hodi halo kampaña vasinasaun kontra COVID-19.

Iha vizita ne’e, vise MEJD dehan, COVID-19 mosu primeiru iha Covalima, maibé apresia tanba ohin Covalima fila ona ba situsaun normal, tanba populasaun Covalima pursentu 86% simu ona vasina no hetan primeiru lugar iha Timor-Leste.

Read More

“Ha’u apresia tebes ba komunidade Covalima  tanba hatur ona situasaun normal no Covalima mós nia pursentu 86% aas liu munisípiu hotu-hotu no Covalima mak sai primeiru lugar iha Timor-Leste,” dehan Vise MEJD ba komunidade sira iha aldeia Tudulpo, Gala, Suku Beco, Tersa (19/10).

Iha tempu hanesan Administradór Munisípiu Covalima, Fransisco de Andrade husu ba komunidade sira atu labele informasaun falsu ne’ebé nakonu ho tendénsia polítika hodi halo povu tauk ba vasina.

“Husu ita-boot sira nafatin fiar ita-nia profesionál saúde sira iha munisípiu Covalima, tanba sira koko ita mak bele deteta ita-nia moras ne’ebé iha no labele fiar informasaun falsu ne’ebé fó sai laiha responsabilidade sira, tanba sira ko’alia de’it iha média sosiál no ibun ba ibun deit,” Katak Administradór ne’e.

Enkuantu Koordenadór Cruz Vermelha Timor-Leste (CVTL) Covalima, Domingos Gravila Amaral ne’ebé organiza atividades kampaña iha aldeia refere katak, totál família 28 iha aldeia refere ho populasaun atus tolu só na’in 20-resin mak seidauk simu vasina.

“Iha ne’e totál populasaun 300-resin no xefe família 28,  maioria mak tuir ona vasina primeiru no segundu, hela de’it 20-resin mak seidauk kompletu, maibé ohin presensa Vise MEJD nian ami garantia katak, ohin sira hotu simu ona vasina, tanba sira mai hotu no komesa rejista ona naran atu vasina,” Nia dehan.

Entertantu kampaña vasinasaun iha aldeia Tudulpu remata, vise MEJD ho kometiva kontinua kedas kampaña vasinasaun iha aldeia Lorokida suku Fohorem, postu administrativu Fohorem.(*)

Related posts