Tempotimor (Kovalima)-Haree ba Eleisaun Prezidensiál ne’ebé sei akontese iha tinan 2022 no Eleisaun Parlamentár ne’ebé sei akontese iha 2023, maka kandidatura 279 tuir ona teste iha Sekretariadu Tékniku no Administrasaun Eleitorál (STAE) iha Kovalima.
“Ohin ami fó teste eskrita ba kandidatu brigada ne’ebé atu destaka iha postu administrativu hitu no hosi suku 30 iha munisípiu Covalima, mak STAE rekruta brigada sira depende ba sentru votasaun, iha postu administrativu sira se postu ida iha sentru votasaun lima, entaun brigada hosi STAE mós na’in lima,” dehan Diretór STAE Covalima, Cláudio Cardoso ba jornalista sira iha nia servisu fatin. Segunda (08/11).
Claúdio afirma, kandidatu brigada ba ElPer hamutuk 279, maibé Kovalima iha de’it sentru votasaun 80, entaun ema na’in 80 de’it mak sei pasa.
“Ita halo rekrutamentu bazeia sentru votasaun hamutuk 80 planu preparasaun ba eleisaun prezidensiál 2022, nune’e STAE sei kontratu brigadista na’in 80 atu destaka iha sentru votasaun iha Munisípio Covalima,” nia hateten
Iha sorin seluk kandidatura Brigada Maria Cesaltina do Carmo dehan, iha teste ne’e liu ka lae, prontu atu simu tanba nu’udar Kovalimaoan lakohi lakon oportunidade.
“Ita tuir teste lalika hakarak liu de’it, maibé liu ka la liu nu’udar Kovalimaoan tenke aplika ba vaga ne’ebé STAE fó sai,” dehan Maria.
Entretantu, matéria teste ne’e sei hetan koresaun husi ekipa juri hafoin anúnsia hikas rezultadu ba sira ne’ebé pasa kontinua ba ezame oral. Bainhira pasa ona husi ezame oral, mak STAE sei halo kontrata ba brigada sira durante fulan tolu, ne’ebé sei hahú iha fulan janeiru to’o marsu 2022.(*)
