Tempotimor (Kovalima)-Tuir manajer Asosiasaun Naroman ba Futuru (ANbF), Domingos Sávio Fernandes Gusmão katak, Sentru Juventude Kovalima (SJK) seidauk iha asesibilidade ba Ema ho Difisiénsia, maka Asosiasaun Naroman ba Futuru halo asesmentu ba fatin refere.
“Ami-nia prezensa ohin iha ne’e, ami hakarak haree kona-ba asesibilidade ne’ebé sentru juventude Kovalima iha asesibilidade ba ema ho difisiensia ka lae, ami mós haree kona-ba fasilidade hanesan rampa ka asesibilidade ne’ebé ema ho difisiensia bele asesu iha fatin sentru ne’e ka lae,” dehan Domingos ba jornalista sira hafoin observa edifísiu SJK, kuarta (17/11).
Nia afirma mós sujerte ba SJK liga ho asesbilidade ba ema ho difisiénsia ne’ebé to’o agora seidauk iha, mak ba futuru SJK tenke iha asesibilidade nune’e ema ho difisiénsia bele hola parte iha sentru refere.
Iha parte seluk, Jerente programa SJK, Barnabe Pereira rekoñese katak, dadaun ne’e Sentru Juventude Kovalima nia edifísiu seidauk iha rampa atu ema ho difisiensia sira bele iha asebilidade
“SJK nia preparasaun ba futuru ha’u hanoin presiza atu halo rampa. tanba sentru hanesan fatin formasaun ba foinsa’e sira. ita labele haree de’it ema normal, maibé haree mós ema ho difisiénsia,” Nia informa.(*)
