Tempotimor (Kovalima)-Autoridade Nasionál Petroleu no Minarai (ANPM) desiminan lei númeru 12/2021, 30 de juñu kona-ba kódigu mineiru nian ba autoridade munisípiu Kovalima.
Presidente ANPM, Florentino Soares Ferreira katak, objetivu husi lei ne’e maka atu favorese oinsa bele explora minarai sira seluk hanesan minarai metáliku ho naun-metáliku.
” Lei no.12/2021, 30 de juñu ne’e liga ho kódigu mineiru, lei ida ne’e sei ajuda ita atu bele favorese oinsa ita bele explora minarai sira seluk, hanesan minarai metáliku ne’ebé ninia matéria prima mai husi besi, osan mean, ida tan maka mineria não metáliku hanesan Fatuk sira Kalkáriu, marmeru no fatuk sira ne’ebé maka iha valores boot atu bele merkadoriza hodi fó reseitas ba estadu, ida ne’e ita fahe enkuadramentu legais ne’ebé liga ho atividades ne’e tomak husi keda lisensa, persepsaun, estudu protesaun meiu ambiente, hareee konteudu lokál, protesaun ba rai no área protezidu sira hotu,” dehan Presidente ANPM ba jornalista sira iha Salaun administrasaun munisípiu Kovalima, (03/12).
Durante ne’e laiha lei ida maka atu regula ba riku soin sira seluk tanba durane ne’e la’o ho Diploma Ministeriál de’it ne’ebé hareee kona-ba materiál konstrusaun nian.
“Lei nú.12/2021, 30 de Juñu ne’e liga ho kódigu mineiru ne’e atu regula riku soin sira, tamba durante ne’e ita laiha lei inan ne’ebé atu hareee ba ita-nia riku soin sira seluk, durante ne’e ho Diploma Ministeriál de’it hodi hareee kona-ba materiais konstrusoens hanesan rai henek, fatuk, nomós britas sira ne’ebé maka fera foho no fatuk hodi halo projeitu konstrusaun sira,” katak Nia.
Lei ne’e mós preve atu haree minarai sira iha valór estratéjiku ne’ebé konsidera minarai raduativus, maibé tratamentu diferente tanba presiza hetan konsiderasaun Konsellu Ministru (KM) hodi hetan aprovasaun husi Konsellu Ministru sira.(*)
