Tempotimor (Covalima)-Sesta-feira (17/12/2021) horseik maizumenus tuku 18:00 komunidade sira rakut membru Polísia Nasionál Timor-Leste (PNTL) ida husi unidade tránzitu tanba deskonfia halo agresaun fíziku hasoru komunidade Ogues.
Tuir Fernando da Cruz nu’udar vítima ba konfrontu ne’e katak, bainhira kastigu hotu foinsa’e na’in tolu ne’e baku tan sira.
“Labarik na’in tolu ida mai haruka bomba-rai no baku, tanba ami iha ne’ebá hotu, depois ha’u tun mai dehan o la puas ka? la puas ka? Entaun hodi nia sorin dudu ha’u, ne’e mak ha’u dehan, heee ba tiha haree o-nia servisu? Entaun nia nervozu tuku ha’u-nia kabás depois hodi liman fuan lima tuku iha ha’u-nia hirus matan, agora sei moras, nia mai atu baku tan, depois Grasi mak satan, depois satan mós labele, ha’u mós sente moras depois nia obriga atu baku tan ha’u, ha’u mós halai sees ba estrada laran ha’u atu telfone, nia baku tun no sama telfone ne’e, ha’u-nia telefone aat kedas, derpente polísia ho naran inisial (M) sori, ne’e mós nia la fiar nafatin,” hatete Fernando ba jornalista sira, Sábadu (18/12).
Iha tempu hanesan, vítima Fernando nia oan feto, Julieta Amaral mós hetan baku husi ajente PNTL ne’e hafoin salva nia aman.
“Nia atu baku ha’u-nia apa mak, ha’u ba salva monu ha’u la sente ona, ha’u haree video mak ha’u mós hakfodak fali, ne’ebé ami hato’o kedas ba eskuadra munisípiu depois hau-nia apa la’ós milisia, ne’e mak baku tuir nia hakarak, katuas ida ne’e ita nurak uza farda ne’e mak komprende nia kondisaun, o ida uza farda agora hodi goza ne’e, hodi se no ha’u-nia apa sala saida?
Vítima Julieta akresenta, nu’udar povu respeita farda ka atributu nasaun nian, maibé atetude ajente PNTL refere ami kondena.
“Ami respeitu ba farda no ami la kontra polísia, maibé ajente polísia ne’e ho kondisaun lanu mak baku no ha’u feto. Se imi mak mai ha’u nia pozisaun ne’e oinsa? Depois nia dehan ba ami, ha-u-nia ferik-oan mós ha’u baku,” konta Julieta.
Maske nune’e sasin ne’ebé lakohi públika nia naran konta kronolójia katak, bainhira membru Polísia Unidade Tránzitu ho naran inisiál “A” ne’e fila husi servisu ho farda kompletu atu fila ba uma iha Fatulor, suku Ogues mak hetan joven sira la uza kapasete nune’e haruka sira halo ezersísiu maibé mosu fali konflitu.
“Polisia inisial (A) ne’e fila loraik ne’e, tula ho nia apa, to’o iha ne’e “ami nia uma oin” hasoru labarik na’in tolu sa’e motor tatuk de’it, la taka kapasete, pois polísia ne’e haruka sira na’in tolu bomba-rai, bomba-rai hotu haruka hamrik pois nia moral sira na’in 3,” dehan sasin ne’e ba www.tempotimor.com liihusi via telefone, Sábadu (18/12).
Sasin ne’e hatuta, bainihira moral hela foinsa’e sira ne’e, depenti rona ema hakilar katak, “polísia ne’ebá ne’e lahatene lei,” hakilar ho lian maka’as, nune’e ajente PNTL ne’e hakbesik aan ba komunidade sira, maibé hetan kedas asaun hasoru membru refere.
“Hakilar ho lian maka’as dehan la hatene lei, polísia ne’e rona sira trata demais los ne’e mak nia mos tun ba, tun ba tan sira, la’o to’o iha ne’ebá maizumenus metru 30, tiu ida mak dehan, “o ne’e se fali” Sira mak sadik sadik los polísia, sira mak ko’alia at uluk, polósia ne’e la baku ema, sira mak dudu lisuk polísia ne’e, dudu nia ba mai loos, entaun dudu malu husi ponte ne’eba, entaun polisia tránzitu ne’e ho komunidade rasta malu iha sentru saúde Ogues nia oin” tenik nia.
Nia akresenta, ema barak kondena katak, membeu PNTL ne’e baku ema, maibé loloos ne’e la baku, depois nia aman monu tanba dudu malu entaun liman sikun mak kona, nune’e ajente refere nia aman monu ba rai.
“Tuir ha’-nia hatene ne’e la’os baku nia aman, atu rasta feto na’in hira ne’e mak nia aman monu, la’os baku, no maun polísia ne’e mós labele kaer feto sira ne’e tanba la uza sensitivu, entaun hakilar malu hodi hamosu problema ne’e,” Nia hatutan.
Relasiona ho notísia ne’e www.tempotimor.com seidauk halo konfirmasaunba Komandante PNTL Munisípiu Covalima, Superintendente Polísia António Maria de Sá tanba iha hela loron feriadu ka fim da semana.(*)
