Tempotimor (Covalima)-Relasiona ho kazu omesidu ne’ebé akontese iha suku Suai-loro iha loron Domingu (23/01/2022) madruga hodi rezulta Júlio Amaral lakon vida no hakanek vítima nia bin no alin hetan kanek todan, maka familia matebian no povu Camanasa ejize justisa urjente hasoru oknum membru Unidade Polisia Maritima (UPM) sira.
“Ami juventude suku Camanasa, lidereansa komunitária ho familia vítima matebian Júlio Amaral, ne’ebé hetan violasaun omísidiu agravadu ne’ebé komete husi oknum Unidade Polísia Maritíma (UPM) na’in neen hodi halakon Júlio Amaral nia vida nomós agresaun fíziku hasoru matebian Júlio Amaral nia bin (Marcelina Amaral) no nia alin-mane (Marcos Amaral) ne’ebé iha kondisaun grave tebe-tebes,” dehan Basílo de Araújo liuhusi konferénsia imprensa iha matebian nia rezidénsia, Ohin (24/01).
Portavóz ne’e afirma, povu Camanasa kondena no lamenta ba hahalok no asaun brutalizmu, bandalizmu no kriminozu husi oknum PNTL iha Unidade Polísia Marítima (UPM) ne’ebé ho naran inisiál hanesan LAM, FdC, MMF, M, GM no J ne’ebé lansa kontra juventude no komunidade.
“Ami konsidera hahalok hirak ne’e la’ós hanesan hahalok seguransa no lutu nasaun nian ba povu, maibé hahalok kriminozu. Nune’e ami husu no ejizi ba Ministériu públiku atu investiga no prosesu lalais kazu omísidiu agravadu ida ne’e no kolabora ho Komandu Jerál PNTL antes julgamentu ba autór hirak ne’ebé ami mensiona iha leten tuir lei ne’ebé vigora iha nasaun RDTL,” dehan Nia.
Povu Camanasa mós ejizi ba Tribunál Distritál Suai (TDS) atu aplika médida koasaun prizaun preventiva ba autór kriminozu na’in neen ne’ebé naran mensiona ona.
“Ami ejizi ba Komandu Jerál PNTL atu fó-sai karta demisaun ba autór kriminozu hirak ne’e antes trinbunál hatún desizaun,” Basílo afirma iha Konferensia Imprensa.
Alende ne’e, nia mós ejize ba komandu jerál atu klarifika loloos ba públiku kona-ba área kontrolu servisu UPM.
“Ami ejise ba komandu jeral PNTL atu ezenora komandante postu UPM ne’ebé destaka iha munisípiu Covalima tanba laiha kapasidade hodi kontrola nia membru sira, inklui husu ba Komandante Jerál PNTL atu muda postu UPM dook husi komunidade ba iha área fronteira,” nia tenik.
Familia matebian mós ejizi ba ministériu kompetente atu tau-matan ba faluk no oan ki’ak na’in tolu husi matebian Júlio Amaral.
Entretantu familia matebian no povu Camansa rekomenda ba Komisáriu PNTL atu rekruta membru PNTL tenke tuir psico-test atu nune’e sira sai membru PNTL ne’ebé preparadu no kualidade.(*)
