Tempotimor (Covalima)-Vise Ministru Administrasaun Estatal (MAE), Lino de Jesus Terrezão hamutuk ho Administradór Munisípiu Covalima (AMC), Fransisco de Andrade fó pose ba administradór foun husi postu administrativu Lima iha munisípiu Covalima ne’ebé durante fulan hira ona mak ezerse funsaun hanesan administradór postu.
Bazea ba desizaun Prezidente Komisaun Funsaun Públika (KFP), Faustino Cardoso nú.4554/2022/CFP, loron 10 janeiru 2022 , kona-ba nomeasaun funsionáriu servisu kargu xefia ba postu administrativu sira, liuhusi prosesu konkorsu interinu ne’ebé selesaun púr-méritu ba mandatu tinan haat.
Iha serimónia solene ne’e vise MAE husu ba Administradór Postu Administrativu (APA) foun sira atu hala’o kna’ar bazea ba dekretu lei número 3/2016.
“Ita hakarak hanoin funsaun administradór postu administrativu ida-idak refleta no fó konfiansa husi governu sentrál ba administradór postu foun sira hodi hala’o kompeténsia tuir dalan lei, liu-liu dekretu lei númeru 3/2016 no atu hatutan politíka VIII governu konstituisionál ne’ebé administradór sesante hala’o ona” dehan Vise-MAE Lino de Jesus Torrezão liuhusi diskursu, iha salaun Administrasaun Covalima, Kampun Baru, Tersa (08/02).
Governante ne’e mós apelu ba administradór postu foun sira atu servisu hamutuk ho veteranu no entidade relevante sira hodi hatutan servisu husi munisípiu ba komunidade.
“Atu hatete ba administradór postu sira katak, la’os servisu mesak hodi hatutan servisu husi munisípiu ba komunidade, maibé ita-nia parseiru dezenvolvimentu iha hanesan ONG no tenke konsidera veteranu sira iha postu administrativu to’o suku,” dehan governante ne’e.
Nia mós parabeniza ba administradór sesante husi postu administrativu lima ne’ebé hala’o servisu durante pandemia COVID-19.
“Ha’u fó parabens ba administradór sesante sira, tanba durante pandemia COVID-19 imi kontinua servisu nafatin no iha esperansa atu dezenvolve postu administrativu, ba administradór foun ha’u sei la hato’o parabens maibé bom traballu ba imi,” Nia tenik.
Iha fatin hanesan administradór foun postu administrativu Fatumea, Geraldo Orleans promote iha nia mandatu sei fó prioridade ba dezenvolvimentu infraestrutura, hadi’a ekonomia, edukasaun no saúde.
“Ha’u-nia mandatu sei hakbi’it to’os na’in sira hodi hasa’e ekonomia iha postu administrativu, tanba durante ne’e ekonomia la la’o, dezenvolvimentu infraestrutura seitór edukasuan la la’o, ami sei esforsu hodi garante kualidade edukasaun, saúde inklui kondisaun estrada aat pesoál difisil atu atende lalais komunidade ne’ebé moras,” tenik Geraldo.
Administradór foun ne’e mós promete sei halo mudansa ba postu Fatumea durante Nia mandatu.
“Ha’u garante iha ha’u nia mandatu ha’u sei halo mundansa iha postu administrativu Fatumea tanba ha’u iha prinsípiu hakarak servisu povu husi halo mudansa iha postu administrativu Fatumea,” nia promete.
Administradór sira ne’ebé hetan pose husi vise-MAE Lino de Jesus Torrezão no Administradór Munisípiu Covalima (AMC), Francisco de Andrade mak hanesan José Afonso administradór postu Fatululik, Constansio do Carmo Cardoso administradór postu Maucatar, Geraldo Orleans administradór postu Fatumea, Carlos Carvalho de Araújo administradór postu Fohorem no Bendito Maia administrativu postu Tilomar.(*)
