Tempotimor (Covalima)-Dezastre naturais ne’ebé akontese iha fulan kotuk hodi afeta ba ema liu rihun ida iha teritóriu nasionál, maka vise Ministru Administrasaun Estatál (MAE), Lino de Jesus Torrezão husu ba komunidade sira atu hela dook husi mota.
Governante ne’e dehan, dala barak komunidade fó sala ba governu, kuandu hetan dezastre naturais ka inundasaun, maibé governu la haruka komunidade sira hela iha mota ninin ka foho leten.
“Dala barak ita la atensaun, mota mak hela uluk ka ita mak hela uluk iha mota ninin, depois hetan tika problema fó kulpa ba governu,” dehan Vise ministru ne’e ba komunidade sira hafoin hala’o vizita ba Covalima hodi halo diálogu ho autoriedade sira kona-ba dezastre naturais ne’ebé akontese iha fulan kotuk, Sesta (14/5).
Governante ne’e afirma, kada tinan governu fakar de’itosan ba inundasaun, tanba komunidade sira ulun toos hodi hela besik mota ninin, maske governu bandu.
“Tinan-tinan governu fakar osan de’it ba problema inundasaun no dezastre naturál, ita sei laiha dezemvolvimentu atu hadi’a buat seluk, buat hotu sei paradu, tanba ne’e husu ba xefe suku no xefe aldeia sira fó hatene ba komunidade sira, tanba imi mak besik liu komunidade no hatene problema komunidade nian, entaun sira ne’ebé hela iha foho leten no mota ninin tenke muda ba fatin ne’ebé seguru,” dehan Torrezão.
Nia subliña, governu lakohi repete tan IDP ne’ebé halo iha tinan 2006 no 2007 tanba fó tiha osan ba komunidade sira atu halo uma, maibé komunidade sira la halo uma.
“Labele akontese tan hanesan tinan 2006 no 2007 ne’ebé IDP entrega osan direta ba komunidade sira, maibé ikus mai sira la halo uma di’ak la to’o tinan uma refere aat hotu,” haktenik nia.
Vise ministru MAE ne’e mós husu ba autoriedade lokál sira atu rekolla dadus ho loloos, nune’e bele fornese dadus kredivél ba munisípiu depois husi munisípiu haruka ba nasionál.
“Xefe suku sira hotu iha Covalima atu haree ba komunidade sira ne’ebé afetadu ka sira-nia uma estragus totál tenke haree hodi hato’o ba administrasaun munisípiu Covalima hodi hato’o ba nasionál, maibé ida ne’ebé estagus naton ne’e kompeténsia liña ministeriál sira mak ajuda materiál sira no ba sira ne’ebé mak hela iha mota ibun tenke sai hotu, tanba udan maka’as mak mota tun estraga hotu uma didi’ak sira,” katak nia.
Entertantu enkontru ne’ebé hala’o iha salaun administrasaun munisípiu Covalima ne’e partisipa husi vise Ministru Estatál Lino de Jesus Torrezão inklui autoridade munisípiu Covalima hanesan Administradór munisípiu, autoridade seguransa PNTL no F-FDTL nomós xefe suku na’in 30.(*)
