Tempotimor (Covalima)-Liga ba polítika governu nian ne’ebé atu proteje sidadaun sira liuhusi vasinasaun kontra Covid-19, mak Vise Ministru Interiór (VMI) António Armindo hahú halo kampaña kona-ba vasinasaun Covid-19 iha munisíiu Covalima.
Tuir vise MI António Armindo katak, mai Covalima atu halo kampaña kona-ba vasinasaun kontra Covid-19, hodi husu no esplika membru Polísia Nasionál Timor-Leste (PNTL) sira oinsa bele iha konsiénsia hodi hakbesik aan ba postu vasinasaun hodi hetan Vasina.
“Objetivu vizita ida ne’e halo kampaña ba vasinasaun, tamba planu estratéjia atu halo desiminasaun ba vasinasaun ida ne’e, tanba membru governu ne’ebé involve iha Inter-Ministeriál hodi tuun ba munisípiu halo kampaña, tamba ne’e horiseik iha Ainaro ohin mai Covalima, hodi esplika atu nune’e sira bele iha konsiénsia hodi hakbesik aan ba Sentru Saúde hodi hetan vasina,” dehan VMI iha komandu PNTL munisípiu Covalima, Sesta (25/06).
Governante ne’e husu ba membru PNTL atu servisu hamutuk ho autoridade lokál no parte saúde sira, hodi halo desiminasaun informasaun ba komunidade, atu nune’e sira bele iha konsiénsia.
“Membru PNTL maioria maka vasina ona, inklui iha Covalima horikalan komandante informa ona iha ne’e sira simu hotu ona, maibe maske simu kompletu ona, husu Nafatin atu kumpri regras ne’ebé iha, no sira mós tenke servisu hamutuk ho autoridade lokál, hodi fahe informasaun ba komunidade sira para sira mós bele hetan hotu,” nia tenik.
Iha fatin hanesan komandante PNTL Munisípiu Covalima, Superintendente Polísia Antonio Maria de Sa agradese no orgullu ho prezensa vise Ministru Interiór nian iha munisípiu Covalima. “Sente kontenteno orgullu, tanba governante ne’e tun direta ba munisípiu hodi halo kampaña,” dehan Komandante ne’e.(*)
