Tempotimor (Covalima)-Hafoin iha loron 23 juñu 2021, governu liuhusi Konsellu Ministru (KM) hakotu ona serka sanitária iha munisípiu Covalima no Bobonaro, maibé liu de’it loron 2, Covalima rejista hikas kazu konfirmadu na’in 24.
Tuir Diretór Servisu Saúde Munisípiu Covalima, Filipe Pereira Lemos katak, númeru pozitivu Covid-19 aumenta hikas iha Covalima.
“Dadus pozitivu Covid-19 molok ne’e hela na’in lima de’it ona, maibé iha loron 25 to’o 29 juñu 2021, kazu aumenta tan ema na’in 24, ne’ebé kazu sira ne’e mai husi klaster Santa-roza iha suku Debos, Bonuk, Eskola Ladi no Sendana, nune’e pasiénte sira ne’e iha izolamentu na’in 19 no auto izolamentu na’in lima no na’in ida mak rekopera tan ona,” dehan diretór Filipe ba www.tempotimor.com Tersa (29/06).
Diretór SSMC ne’e husu nafatin ba sidadaun sira atu kumpri regras Organizasaun Mundiál ba Saúde (OMS) no Ministériu Saúde (MS) tanba númeru pozitivu tun to’o na’in lima, maibé sa’e fali ona ba 20-resin.
Nia mós husu ba Covalimaoan hotu tenke hakbesik aan ba Sentru Saúde hodi simu vasina Covid-19.
Entretantu dadus nasionál ba Covid-19 atualmente sidadaun na’in 790 mak kontinua kumpri izolamentu no auto izolamentu, na’in rihun 8.306 mak rekoperadu ona no na’in 22 mak lakon vida ona ho Covid-19, nune’e totál abitante ne’ebé infesaun ona ho Covid-19 hamutuk rihun 9.118.(*)
