Tempotimor (Covalima)-Haree ba elesiaun prezidensiál no eleisaun parlamentrál ne’ebé sei akontese iha tinan 2022 no 2023, maka governu liuhusi Sekretariadu Téknika Administrasaun no Eleitorál (STAE) Munisípiu Covalima halo ona lansamentu ba resenseamentu eleitorál no atualizasaun baze dadus.
Diretór STAE Munisípiu Covalima, Claudio Cardoso hateten, lansamentu ne’e halo tamba antes ne’e iha ona rekrutamentu ba pontu fokál, operadór sistema, asisténsia operadór hamutuk na’in 21 ne’ebé sei destaka iha postu, hodi lidera rensensiamentu iha munisípiu Covalima.
“Ohin halo lansamentu ba resenseamentu eleitorál no atualizasaun baze dadus e’ebé ofesialemnte lansa husi Administradór munisípiu Covalima, entaun hahú husi ne’e sei halo atendimentu ba sidadaun sira no sei termina iha Janeiru 2022, depois sei públika lista iha sede suku ida-idak atu nune’e eleitores sira bele haree karik balu laloos bele hadi’a,” dehan diretór STAE ne’e liuhusi nia diskursu iha Suai, Kinta (01/07).
Diretór ne’e hatutan, númeru rekursu umanu ne’ebé iha sufisiénte atu atende sidadaun sira iha prosesu resensensiamentu eleitorál iha postu sira.
“Númeru ne’ebé iha sufisiénte atu atende iha postu sira, kestaun ba materiál ne’ebé back-up iha nasionál tempu badak sei distribui mai munisípiu, depois halo pakote iha munisípiu hodi distribui ba postu hitu,” katak nia.
Iha fatin hanesan, administradór munisípiu Covalima Francisco de Andrade husu ba entidades hotu atu kolabora iha prosesu resensiamentu eleitorál ne’e.
“Atu servisu ida ne’e di’ak liután bainhira sira tun ba iha baze, entidades hotu liu-liu partidu polítiku sira hotu tenke kolabora ho sira atu nune’e bele fó dadus ne’ebé loos. Liu-liu partidu polítiku sira, lori imi-nia militante sira ba atualiza baze de dadus ne’e, tamba imi mak iha militantes,” dehan nia.
Alende ne’e Segundu Komandante PNTL Munisípiu Covalima, Superintendente polísia Albino Mouzinho katak, bainhira rensensiamentu ne’e la’o iha postu, STAE sei la servisu mesak, maibé parte PNTL sei akonpaña hodi halo seguransa.
Entertantu tuir dadus provizóriu ne’ebé provizoriamente totál eleitores iha munisípiu Covalima hamutuk rihun 50.395.(*)
