Tempotimor (Covalima)-Komemorasaun loron nasionál saúde ba dalima mak reprezentante Organizasaun Mundiál ba Saúde (OMS) iha Timor-Leste Kongratula governu liu-liu pesoál saúde sira iha Ministériu Saúde.
Reprezentante OMS iha Timor-Leste, Arvind Mathur sente kontente tebes partisipa iha komemorasaun loron nasionál saúde ba dalima, tanba loron ne’e importante tebes.
“Ha’u foti oportunidade ida ne’e hodi kongratula governu, pesoál saúde no vasinadór sira hotu ba momentu furak ida ne’e, maske ho istória badak, maibé nasaun ida ne’e halo progresu ne’ebé di’ak tebes hodi hadi’a sidadaun sira-nia saúde no haforsa sistema saúde iha rai laran,” dehan Arvind liuhusi diskursu bainhira partisipa iha komemorasaun loron nasionál saúde ba dalima iha Suai, Ohin (22/07)
Reprezentante WHO ne’e reforsa, TL maske hasoru situasaun difisíl kona-ba Covid-19, maibe servisu hotu la’o di’ak no lalais.
“Servisu ne’ebe lalais no populasaun elizivel sira ba vasina Covid-19 di’ak tebes,” katak nia.
Nia mós fó hanoin ba komunidade atu kumpri nafatin médida prevensaun Covid-19 hanesan uza máskara, mantein distánsia sosiál no fíziku, fase liman beibeik.(*)
