Tempotimor (Covalima)-Sesta (30/07) timoroan ida hetan tiru husi Tentara Nasionál Indonézia (TNI) iha fonteira rai entre Timor-Leste ho Indonézia.
Iha akontesimentu ne’e Forsa TNI na’in rua no membru polísia na’in ida hamutuk ho komunidade sira asaltu no sunu uma baraka no estragus sasan husi kompañia Sister Motor no tiru kanek traballadór timoroan ida ne’ebé servisu iha kompañia refere.
“Asaun tiru ne’e, hakanek timoroan ida iha parte liman karuk, ne’ebe ita kontaktu kedas ba sira iha Indonézia horseik, ne’ebe sira mós mai kedas hodi rezolve problema ne’e,” dehan komandante PNTL Munisípiu Covalima, Superintendente Polísia António Maria de Sá ba www.tempotimor.com iha nia knaar fatin, Sábadu (31/07).
Komandante ne’e akresenta, asaun tiru kanek Timoroan ida no sunu uma ne’e, tanba sidadaun na’in lima husi postu Fatumea deskonfia na’ok karau 16 iha área Indonézia parte Nusa Tengara Timur (NTT).
“Motivu husi kazu ne’e tanba sidadaun na’in lima hakat liu ba sorin parte NTT nian, iha ne’eba sira na’ok ema-nia karau 16 hanesan ne’e hodi tama mai postu administrativu Fatumea,” Haktenik nia.
Iha fatin seluk, vítima Orlando Soares sente triste tanba lahatene buat ida, maibé hetan atira husi militar Indonézia.
“Ha’u lahatene buat ida, derepente sira asalta hodi sunu uma baraka no hodi kilat manu tiru ha’u-nia liman karuk,” dehan Nia.
Hafoin akontesimentu ne’e, Komandante eskuadra Munisípiu Covalima no Komandante Unidade Polísia Fronteira (UPF) kompañia ho Unidade Batallaun Ordem Públika (BOP) tun kedas ba terenu hodi atua no Polísia Servisu Investigasaun Krimininal (PSIK) halo kedas investigasaun.
Alende ne’e reprezentante forsa husi rai rua ne’e buka kedas alternativu liuhusi diálogu hodi rezolve problema refere no evita hodi la hamosu tan kazu foun iha futuru.(*)
