Tempotimor (Covalima)-Prezidente Cruz Vermelha Timor-Leste (CVTL), Madalena Hanjam apresia servisu Unidade Patrollamentu Fronteira (UPF) no servisu saúde munisípiu Covalima tanba halo servisu ho rigór iha fronteira rai entre Timor-Leste ho Indonézia.
“Ha’u apresia tebes ho programa Ministériu Saúde nia programa, tanba komunidade iha fronteira mós simu ona vasina primeiru doze no balu kompleta ona vasina dalarua nomós segunransa sira kontrola máximu iha fronteira husi primeiru kuandu Covid-19 tama iha Timor-Leste to’o agora laiha movimentu husi Indonézia mai Timor-Leste,” dehan Prezidente CVTL Madalena ba www.tempotimor.com hafoin hala’o vizita ba komunidade sira iha fronteira, Ohin (31/07).
Nia afirma, vitita ba postu administrativu rua ne’e atu haree komunidade sira kona-ba vasina kontra Covid-19 inklui servisu UPF nian.
“Mai observa iha fronteira Postu Tilomar no Fohorem hodi haree no husu komunidade sira hela besik fronteira Indonézia ne’e simu ona vasina ka lae nomós oinsa kondisaun seguransa Polísia Fronteira sira durante Covid-19 mai to’o ágora kona-ba variente Delta,” nia tenik.(*)
