Tempotimor (Covalima)-Sábadu (31/07/2021) semana ne’e, Unidade Patrollamentu Fronteira (UPF) halo kapturasaun ba Timoroan na’in lima iha fronteira Postu Integradu Salele Tilomar, tanba hatama sasan ilegál mai teritóriu nasionál.
“Sira na’in lima hetan kaptura tanba lori sasan ilegál hanesan tabaku sek bal neen tama mai, ne’ebé sira sai husi karantina mak ita halo investigasaun didi’ak ema ne’e se no husi ne’ebé, tanba agora dadaun ita sei entrega ba parte saúde sira hodi hatama ba karantina,” dehan Komandante PNTL, Munisípiu Covalima Superintendente António Maria Sá iha nia knaar fatin, Sábadu (31/07).
Komandante PNTL ne’e afirma, dadaun ne’e sidadaun na’in lima obrigadu iha ona karantina bairru-kosta hodi kupri regras saúde nian.
“Agora dadaun sira iha karantina hodi kumpri regras saúde nian durante loron 14, hafoin ida ne’e mak Polísia Investigasaun Kriminál kontinua halo investigasaun no evidénsia ne’ebé iha tuir lei,” Nia informa.
Ba kazu ne’e, komandandu PNTL munisípiu Covalima apela ba komunidade hotu atu kumpri nafatin dekretu Prezidente Repúblika (PR) ba Estadu Emerjénsia (EE) ne’ebé bandu ema hotu labele halo atividade kontra bandu iha liña fronteira hodi evita transmisaun moras virus variente Delta.(*)