Tempotimor (Covalima)-Relasiona ho moras Covid-19 ho variante Delta ne’ebé tama ona Timor-Leste, mak Segundu Komandante Polísia Nasional Timor-Leste (PNTL) munisípiu Covalima, Superintendente Asistense Albino Mouzinho husu komunidade sira iha Fronteira postu Administrativu Fatululik labele halo movimentu ilegal iha área fronteira.
“Husu ita-boot sira mak hela iha fronteira labele halo movimentu ilegál ka hakat ba nasaun viziñu Indonézia. Ita-boot sira atu halimar, entaun halimar iha área iha ita-nian, nune’e labele iha transmisaun moras refere,” dehan komandante Albino ba www.tempotimor.com iha aldeia Fatuloro, Suku Taroman, Kuarta (04/08).
Nia husu ba autoridade lokál sira iha Fatululik atu kontrola, nune’e iha sidadaun oin foun, informa lalais ba parte seguransa hodi hatene ninia identidade.
“Husu ba ita-boot sira tenke atensaun ba ema oin foun ruma mai iha ita-boot sira nia suku no aldeia tenke husu nia no hatene nia, para ita-boot sira hatene ema ne’e se no nia halo movimentu ilegal tenke hato’o keixa hodi prosesu nia ba tribunál nomós ita-boot sira mak hela iha ne’e mós hanesan, karik halo movimentu ilegál kaptura ita-boot sira no prosesa, nune’e labele lori moras ne’e tama mai área ita nian,” haktenik Nia.(*)