Tempotimor (Covalima)-Kuarta-feira (01/09/2021) ohin vítima na’in rua deskuti malu ho funsionáriu ida husi Ministériu Agrikultura no Peskas (MAP) iha munisípiu Covalima ho inisál MS, tanba bosok komunidade na’in ne’e hodi fó osan dollar $600-resin ne’ebé promete sei fó servisu ba komunidade sira ne’e, maibé besik tinan ida ona, funsionáriu ne’e dezvia husi nia promesa.
Ba situasaun ne’e, vítima Natalino Cardoso husi aldeia Wetaba hamutuk ho nia Tia buka no hasoru funsionáriu MAP ne’e hodi diskute malu kona-ba kobransa ne’ebé pesoál funsionáriu refere halo ona ba vítima sira iha Abril 2021.
“Osan ne’e ami manda ba nia liuhusi Mosan Telemor iha fulan Abril 2021, nia dehan haruka ami servisu iha kompañia ida no servisu sensus ba kbi’it laek nian no projetu ida. Ami mós tempu difisil hanesan ne’e buka hela servisu ne’ebé ami na’in neen manda osan ba nia husi Mosan ne’ebé osan hamutuk $600 resin, maibé tama ona fulan Setembru ami la rona informasaun kona-ba servisu nian husi nia,” dehan vítima Natalino ba jornalista sira hafoin diskute malu ho funsionáriu MAP refere iha edifísiu Konsellu veteranu Munisípiu Covalima (KVMC) nia oin, Kuarta (01/08).
Vítima ne’e mós husu ba funsionáriu refere atu develove hikas vítima sira-nia osan, maibé se devolve mak vítima sira sei levanta kazeu ne’e ba justisa.
“Nia bosok ona ami na’in neen, nia haruka ami hatama osan sira ne’e depois to’o ágora la fó servisu ida ba ami to’o agora, ne’ebé ami husu ba nia karik atu entrega osan mós ho funan sei lakohi ho funan maka ami sei prosesu nia, tanba nia bosok ona ami,” hateten nia
Entertantu funsionáriu MS ne’ebé durante ne’e servisu hanesan funsionáriu asisténsia irigasaun iha parte postu Zumalai rekoñese katak halo duni kobransa, tanba ne’e promete sei entrega hikas osan sira ne’e.
“Ha’u servisu iha irigasaun asistente iha postu administrativu Zumalai Munisípiu Covalima, entaun iha tempu ne’ebá ha’u hateten ba sira ne’e haruka sira servisu duni, realidade servisu laiha, Entaun osan ne’e ha’u mak uza fali, tanba estadu emerjénsia ne’ebé servisu la jadi, ha’u halo kobransa ne’e haruka sira iha servisu kompañia, ha’u rekolha dadus ba kompañia sira, hanesan kompañia hira mak eziste iha munisípiu Covalima, husi ha’u mak ne’e sei esforsu-an iha fulan ida ne nia laran sei entrega fila fali osan ne’e ba iha sira-nia uma, tanba alin nia apa ne’e ami uma lisan ida, sira na’in ne’en, na’in ida hatama $110.00, ida hatama $105.00 no na’in haat seluk $100.00 kada ema,” hateten nia.(*)
Entertantu liga ba akontesimentu ne’e parte vítima sira seidauk hato’o keixa ba parte Polísia Investigasaun Munisípiu Covalima, tanba sei hein ba promesa ne’ebé pesoál funsionáriu ne’e halo ho sira.(*)
