Tempotimor (Covalima)-Liga ba despaxu númeru 44/GMEJD/VIII/2021 ne’ebé Minstériu Edukasaun Juventude no Desportu (MEJD) fó sai no suspende provizóriu ba atividade aprendisajem iha munisipiu Covalima, Dili no Manufahi husi loron 26 agostu to’o loron 10 setembru 2021, mak estudante no manorin sira iha Eskola Sekundária Jerál Públika (ESJP) Suai hahú hikas ona aula prezensiál hanesan baibain, tanba seidauk iha despaxu foun husi MEJD.
Ba kesatun ne’e, Diretór Eskola Sekundária Jerál Públika Suai, Francelino Freitas Belo katak, tanba seidauk iha despaxu foun husi MEJD kona-ba suspensaun ba aula prezensiál, tanba ne’e eskola refere hahú ona aula maske kontinua kumpri regra Ministériu Saúde (MS) no Organizsaun Mundiál ba Saúde (OMS) nian.
“Despaxu númeru 44/GMEJD/VIII/2021 iha momentu ne’ebá husi MEJD suspende provizória atividade ensinu aprendisajem, iha loron 26 agostu to’o 10 setembru fuln ne’e, maibé agora dadaun seidauk iha despaixu ruma katak, atu kontinua suspende, nebe ohin eskola komesa fali ho aula normál,” dehan Diretór ESJP Suai Feliciano ba www.tempotimor.com liuhusi via telefone, Tersa (14/09).
Alende ne’e, ESJP Suai mós kaer ba orientasaun husi MEJD katak, atu rekolla mós kartaun vasinasaun hodi identifika profesór hira maka vasina ona no hira maka seidauk.
“Iha eskola ne’e profesór sira 95% maka simu ona vasina, maibé eskola fó aviza ona liuhusi pájina eskola nian katak, profesór sira tenke simu vasina ona para atu halo relatóriu ba nasionál,” katak Francelino.
Entertantu totál estudante iha eskola sekundária jerál públika Suai hamutuk rihun 2.175, husi totál ne’e estudante maioria mak simu ona vasinasaun,maibé sira ne’e tinan 18 mai kraik seidauk simu vasina nomós eskola refere kontinua kria kondisaun bazeia ba regras OMS nian.(*)
