Tempotimor (Covalima) Tuir xefe interinu postu saúde Suai Villa, Agustino Amaral Dos Santos katak, komunidade postu administrativu hamutuk 74,3% mak simu ona vasina kontra Covid-19.
“Iha postu Suai Komuniadade maioria simu ona vasina, tanba tuir dadus ne’ebé ami iha maka primeiru doze ho porsentu 74,3% no segundu doze ho porsentu 32,4%, ne’ebé husu komunidade kontinua mai hetan vasinasaun,’’ dehan Agustino ba www.tempotimor.com, Kuarta (29/09).
Xefe postu saúde ne’e mós kontinua enkoraja ba komunidade sira atu hakbesik aan ba sentru saúde hodi simu vasina inklui bele kompleta vba doze daruak ba sira ne’ebé simu ona doze dahuluk.
“Ami la limita ema ida, ne’ebé ba se de’it maka hakarak kompleta vasinasaun daruak nian nafatin mai hodi simu vasina, nune’e halo movimentu livre no dook husi moras ne’ebé agora ema hotu trauma,” haktenik Nia.
Nia mós afirma, ba komunidade ne’ebé sente iha moras bele hakat va sentru saúde atu hetan tratamentu saúde, tanba durante ne’e komunidade sira menus halo tratamentu saúde iha sentru saúde, tanba tauk Covid-19.
Entretantu dadus nasionál ne’ebé Ministériu Saúde (MS) iha 28 setembru 2021 katak, munisípiu Covalima rasik komunidade foin 33,2% mak simu vasina, maibé 67,8% seidauk simu vasina. Alende ne’e dadu husi teritóriu nasionál pursentu 35,5% mak simu ona vasina.(*)
