Tempotimor (Covalima)-Sábadu (02/10/2021) semana ne’e vise Ministru Edukasaun Juventude no Desportu (MEJD), António Guterres sente triste bainhira haree kondisaun Eskola Bázika Filial (EBF) Hali-Laran Suku Datorua Postu Administrativu Fohorem munisípiu Covalima ne’ebé kondisaun aat.
“Há’u triste haree kondisaun eskola ida ne’e, se tinan kotuk ne’e há’u rona karik ita bele hadi’a, tanba iha Suai loro uluk há’u ba haree kondisaun att los, maibé tinan ne’e ita hadi’a, maske estudante iha ne’e oituan, maibé fatin tenke di’ak ba sira, ne’ebé ida ne’e tinan oin há’u sei tau matan,” dehan vise MEJD, António ba jornalista sira, Sábadu (02/10).
Iha fatin hanesan Kordenadora EBF Datorua, Maria Amaral Pereira katak, eskola refere halo iha tinan 2000, to’o iha tinan 2015 eskola ne’e hetan estragus husi desastre naturais (anin boot), to’o agora kontinua aat.
” Eskola ne’e halo iha tinan 2000, depois to’o iha tinan rihun 2015 anin sobu ninia kalen sira ne’e, depois sala-de-aula mós la to’o ba ami-nia estudante sira,” tenik koordenadora ne’e.
Entretanto observasaun www.tempotimor.com iha terenu nota katak, EBF Datorua ne’e kondisaun aat inklui eskola ne’e kompostu husi sala-de-aula haat no biblioteka ida. Alende ne’e, eskola EBF Datorua iha totál estudante 65 no profesór na’in ualu ne’ebé kompostu husi professor permanente na’in neen no voluntariu na’in rua.(*)
