Tempotimor (Kovalima)-Ministériu Interiór (MI) liuhusi Gabinete Planeamentu Estratéjiku no Asesoria (GPEA) disemina funsaun dekretu lei nu. 47/2020, 7 de Outubru no Diploma Ministeriál nu. 53/2021, 21 Julho ba funsionáriu Ministériu Interiór nian iha Covalima.
Diretór GPEA, Francisco Soares hatete, objetivu husi diseminasaun ne’e oinsa funsionáriu sira husi diresaun haat iha Kovalima bele kompriende hodi hala’o servisu tuir papél no responsabilidade ne’ebé asumi.
“Objetivu diseminasaun ba dekretu lei nú. 47/2020, 7 de Outubru no Diploma Ministeriál nu. 53/2021, 21 Jullu ne’e atu fahe informasaun ba funsionáriu sira kona-ba servisu saida maka governu atribui ba Ministériu Interiór ho nia estrutura hotu, tanba ne’e Lei rua ne’e hanesan giaun ida ba sira oinsa Diresaun sira halo servisu tuir papel no responsabilidade ne’ebé iha no labele halo servisu fora husi regras sira,” dehan Diretór Fracisco ba jornalista sira iha Suai, Segunda (15/11).
Francisco mós dehan, durante ne’e Ministériu Interiór liuhusi GPEA seidauk identifika diresaun sira ne’ebé la servisu tuir regras, tanba GPEA seidauk iha peskiza ruma kona-ba asuntu ne’e.
“Ita tenke liuhusi estudu ruma maka hodi hatene sira la’o tuir regras ka lae?, maibé diresaun sira tenke hatene sira-nia papél no responsabilidade, karik halo servisu kontra fali regras entaun ne’e iha sansaun, karik mak deteta asaun ruma entaun dalan legál tenke prosesu,” katak Francisco.
Iha fatin hanesan, xefe Departamentu DNSPP Munisípiu Kovalima, Júlio Alves Amaral katak, liuhusi formasaun ne’e bele hasa’e sira nia koñesimentu oinsa hala’o servisu tuir lei haruka.
“Formasaun ne’e importante ba ami atu hatene di’ak liután oinsa hala’o servisu tuir lei ka regras ne’ebé iha, maibé ami durante hala’o servisu apoiu familia vitima dezastre naturais ne’ebé maka ami identifika,” Julio dehan.
Entertantu formasaun ba lei rua ne’e sei hala’o durante loron rua ne’ebé hahu 15 to’o 15 novembru 2021, ne’ebé realiza iha salaun Eskola Sekundária Jerál Públika (ESGP) Suai, no Partisipantes husi Diresaun haat mak hanesan Protesaun Sivíl, Bombeirus, DNSPP, Direaun Nasional Protesaun Konflitu Komunitáriu (DNPKK).(*)
