Tempotimor (Kovalima)-Relasiona udan boot ne’ebé akontese iha fim de semana ne’e, halo mota Tashilin ameasa hakotu ponte Lomea ne’ebé liga postu Suia vila ba Zumalai. Nune’e difikulta movimentu transporte públiku husi Dili mai Kovalima.
Komunidade Evalisa Mendonça katak, ponte Lomea sai ameasa boot ba komunidade Postu administrativu Zumalai, tanba labele halo movimentu ho kareta, tamba kondisaun ponte hela de’it rohan atu kotu.
“Ami husu ba ita nai ulun sira se bele ateru rai halo metin oituan, tanba kada tinan udan ne’e sempre ateru de’it mak ponte rohan ho rai henek ne’e,entaun udan makas ne’e mota lori bebeik, ne’ebé agora dadaun kareta labele liu, so motor de’it, tanba hela rohan de’it,” Hatete kominidade Evalisa ba www.tempotimor.com, Segunda (15/11).
Iha sorin seluk motorista Mouzinho Perreira husu autoridade postu no munisípiu atu toma atensaun ba ponte ne’e, tanba kada tinan sempre akontese.
“Agora ami lori kareta labele liu, tanba hela de’it metru ida, ne’ebé ami husu ba autoridade postu hato’o ba munisípiu para bele hadi’a ho tempu lalais oituan, nune’e ami bele halai ho kareta di’ak,” katak Mouzinho.
Xefe suku Tashilin, Martinho Magno katak, kona-ba dezastre naturais ne’e hato’o ona ba administradór postu administrativu Zumalai atu nune’e bele konsidera iha tempu badak.
“Sim, horseik kalan mak akontese udan boot hodi estraga ponte ne’e hela de’it rohan. Ha’u hato’o ona ba ita-nia nai administradór postu, ne’ebé ita nia administradór sei hato’o ba Munisípiu, nune’e bele responde,” afirma xefe suku ne’e.
Entertantu xefe suku Tashilin akresenta, iha tinan 2020 Institutu Jestaun ba Ekipamentus (IJE) mak reabilita, maibé estragus fali ona, entaun husu autoriedade munisípiu no postu atu fó resposta ho emerjénsia ba kestaun ne’e, tanba ponte ne’e ligasaun dalan nasional nian.(*)
