Tempotimor (Covalima)-Komandu Jerál Polísia Nasionál Timor-Leste (PNTL) orienta ona ba komandu sira iha munisípiu hotu atu halo seguransa ba loron boot festa Natal no Tinan Foun 2022.
Liga ho orientasaun refere, mak Komandante Polísia Nasional Timor-Leste (PNTL) munisípiu Covalima, Superintendente Polísia António Maria de Sá mós alerta ona ba komandante eskuadra sira iha postu administrativu hitu hodi fó seguransa ba loron natal no tinan foun.
“Komandu jerál PNTL hanesan instituisaun aprellu estadu nian, tamba ne’e komandu PNTL munisípiu Covalima fó ona orientasaun ba komandante PNTL sira iha eskuadra postu administrativu hitu, tantu unidade seguransa sira hotu no halo mós koordensaun seguransa tarefa sira hotu ne’ebé destaka iha munisípiu Covalima laran, tamba ne’e ita prontu garantia seguransa liu-liu liga ho loron boot Natal no tinan foun nian, katak iha loron Natal no tinan foun ne’e ita iha ámbitu paz, hakmatek no establidade tamba ne’e husu komunidade sira bele demonstra sira-nia fiar hodi prepara aan hodi simu kosok oan Nai Jesus ne’ebé mak atu moris,” dehan Komandante Munisípiu Covalima, António iha nia knaar fatin, Kinta (16/12).
Komandante ne’e mós afirma, orientasaun husi komandu jerál la autoriza juventude sira halo prejépiu iha dalan ninin.
“Despaixu husi komandu jerál PNTL ne’ebé hatun mai iha munisípiu bainhira ita komemora Santa Natal, joven sira atu halo prejépiu karik labele halo iha estrada ninin, bele halo de’it prejépiu iha ida-idak nia uma, tamba ita desmostra ita-nia fiar ne’e labele hatudu fali iha estrada ninin, depois hamosu risku ingrafamentu movimentu pùliku nomós seluk tan,” dehan Nia.
Komandante ne’e akresenta, bainhira halo prejépiu tenke respeitu nia tamba ita komemora loron moris jesus kristu nian,
“Ita labele hemu lanu fali iha prejépiu no dansa fali iha prejépiu laran ida ne’e bandu tamba prejépiu ne’ebé ita halo ne’e ho sentidu hametin ita-nia devosaun fiar nian,” Nia tenik.
Entertantu iha intervista ne’e nia mós husu ba komunidade sira hotu iha munisípiu Covalima liu-liu juventude sira labele halo barullu no hemu lanu hodi halo problema iha loron natal no tinan foun, maibé Harii unidade hodi hametin pas no establidade iha Covalima.(*)
