Tempotimor (Covalima)-Komandante Polísia Nasionál Timor-Leste (PNTL) munisípiu Covalima, Superintendente polísia António Maria de Sá apreseia ba membro na’in walu ne’ebé hetan promosaun ba deviza husi ajente ba ajente prinsiál.
“Apresia tebes ba sira na’in walu ne’ebé husi ajente ba ajente prinsipál, ba sira seluk ne’ebé seidauk hetan oportunidade nafatin haka’as aan hodi hatudu komportamentu di’ak, hadi’a aan no estuda maka’as, servisu ho di’ak, nune’e instituisaun PNTL bele tau matan, ba sira ne’ebé ohin simu deviza nafatin firme hatudu disiplina nafatin ba oin,” dehan Komandante António liuhusi diskursu hafoin halo promosaun ba membro na’in walu ne’e iha komandu Jerál Covalima, Sesta (17/12).
Nia afirma, membro sira halo servisu di’ak, kada tinan lima tenke halo promosaun ba diviza, nune’e ba membru sira ne’ebé komportamentu di’ak.
“Promosaun ho natureza ba antigidade ohin ba promosaun sira ne’e ba klase hanesan, ba sira ne’ebé laiha kazu pendente ruma, tantu promosaun ida ne’e ho karakter antigidade, ne’ebé tuir lei sira ne’ebé didikasaun tinan lima ona tenke halo promosaun deviza ba sira, ne’ebé ohin ajente muda ona ba ajente principal. Ne’ebé tuir kultura militar ninian, bainhira halo promosaun ba membru sira, signifika iha responsablidade hodi serví nomós proteje ita-nia komunidade sira,” katak Nia.
Komandante ne’e mós reforsa katak, membru sira servisu iha instituisaun PNTL la’ós hobby, maibé vokasaun ne’ebé Maromak fó atu serví povu no rai ida ne’e, ne’ebé tenke hadomi to mate.
Entertantu membru sira ne’ebé hetan promosaun diviza husi ajente ba ajente prinsipál mak hanesan; Olivio Gusmão, Nelson Alexandre, Alexandre Nelson Sarmento Asa Mendonca, Leonito Leite, Ferdi T. do Rosário, Alexandre Yohanes Rata, Bendito do Carmo no Fransisco Passeco Alves.(*)
