Tempotimor (Covalima)- Polisia Nasionál Timor-Leste (PNTL) Munisípiu Covalima kompostu husi Batallão Ordem Públiku (BOP), Unidade Polisia Fronteira (UPF) Unidade Polisia Marítima (UPM) ho Falintil-Forsa Defeza Timor-Leste F-FDTL halo preparasaun hodi implementa patrollu konjuntan ba loron natal no tinan foun.
Segundu Komandante PNTL Munisipiu Covalima, Asisten Superintendente Albino Mauzinho do Rego hatete, simu ona orientasaun husi Komandu Jerál atu asegura situasaun ba festa natal ho tinan foun.
“Tuir orentasaun Komandu Jerál nian mai iha Komandu hotu-hotu, liu-liu Munisipiu Covalima hodi haree situasaun jerál durante periodu festa natal no tinan foun ne’ebe sei mai no haree mós ita nia alin joven sira ne’ebé halo prejépiu iha dalan ninin mínimu tenke metru lima nulu (50m) dok husi estrada públiku,” dehan Mauzinho husi ninia diskursu iha Komandu PNTL Covalima, (23/12).
Membru PNTL ho F-FDTL sei halo Show Force haleu kapital munisípiu hodi halo sensibilizasaun ba joven sira kona-ba regras hirak ne’ebé estadu fó sai ona, relasiona ho festa natal no tinan foun nian.
“Depois ita sei halo movimentasaun ba iha mota-masin liu husi kasabauk, sei iha tempu karik sei ba mos lalawa, atu ita dezamina informasaun ba ita nia jovem sira, komunidade tomak iha Covalima katak, ami garantia seguransa ba ita boot sira, maibé regras empedimentu estadu fó mai katak, halo prejépiu karik tenke 50m ba kotuk, depois labele hemu tua ho karaoke iha prejépiu,” Mouzinho informa
Entretantu, Segundu komandante husu ba membru PNTL no F-FDTL atu hasa’e profesionalismu parte seguransa nian, atu bainhira simu loron natal no tinan foun bele garantia komunidade sira moris ho seguru, dame paz no estabilidade. (*)
