SEAK: “Kultura Forte, Nasaun Metin”

Lia-na'in sira husi Covalima partisipa hela iha kampana nasional ne'ebe realiza husi SEAK kona-ba kultura forte, nasaun metin iha salaun Uma Feto, Covalima, Tersa (28/12). Foto Tempo Timor

Tempotimor (Covalima)-Governu liuhusi Sekretáriu Estadu Arte no Kultura (SEAK) realiza kampaña nasionál iha salaun Uma Feto munisípiu Covalima ho tema “Kultura Forte, Nasaun Metin” ho objetivu atu halo salvaguarda ba cultura Covalima nian iha futuru.

Tuir Diretór Jeral (DJ) Arte no Kultura, Manuel Ximenes Smith katak, objetivu husi kampaña ne’e oinsa enkoraza lia-na’in sira atubele transmiti kultura orijinal ba jerasaun foun sira.

Read More

“Iha kampaña ne’e ita bolu ita-nia katuas lia-na’in sira ne’e para sira bele transmiti informasaun loloos kona-ba orijinalidade Covalima nian ba jerasaun foun sira, atu nune’e mantein salva guarda ba ita-nia kultura orijinal ne’e,” Dehan nia liuhusi diskursu, Tersa (28/12).

Iha fatin hanesan, Prezidente Komisaun G, Parlamentu Nasionál (PN), António Verdial agradese ba kampaña nasionál kultura nian ne’ebé SEAK realiza, tanba ne’e nia parte sei apoiu hodi tau matan ba munisípiu Covalima.

“Hanesan deputadu ne’ebé responsabiliza ba área Edukasaun, Joventude, Kultura no Sidadania há’u sei suporta Sekretáriu Estadu Arte no Kultura hodi tau matan ba rai Covalima,” dehan representante povu ne’e iha Covalima.

Alende ne’e reprezentante Administradór Munisípiu Covalima, Fransisco Mendonca “Tatamero” husu ba SEAK atu kontinua halo kampania ba kultura, tanba kultura komesa mihis dadaun.

“Husu ba ita-nia nai ulun kona-ba arte no kultura nian kontinua halo kampaña kultura nian ba ita-nia komunidade sira, tanba agora dadaun kultura tradisionál tebe-tebe ho dahur originál sira seluk komesa menus dadaun, nune’e bele haburas fila fali kultura Timor nian,” nia dehan. Entretantu iha kampaña nasionál ne’e hetan partisipasaun másimu husi lia-na’in sira iha postu administrativu hitu inklui aprezenta mós kultura original kada postu administrativo nian.(*)

Related posts