Tempotimor (Covalima)-Kinta-feira (13/01/2022) horseik, Diretór sesante Edukasaun Munisípiu Covalima (EMC), Edmundo Fereira entrega ona servisu ba Diretór EMC foun Rui Suri Seran.
Iha serimónia handover servisu ne’e, Diretór sesante EMC, Edmundo Fereira agradese tebes, tamba durante tinan lima servisu hotu iha edukasaun la’o ho di’ak to’o mandatu remata.
“Hau agradese tebes ba funsionáriu sira hotu durante ne’e ami aprende hamutuk no durante ha’u-nia mandatu ne’e sira koopera diak tebes iha tinan lima nia laran, maske hetan proplema oioin, maibé to’o ohin loron buat hotu la’o ho di’ak,” dehan Edmundo liuhusi diskursu iha salaun EMC, Kinta (13/01).
Iha fatin hanesan, atuál diretór EMC, Rui Suri Seran fó obrigadu no agradese ba diretór sesante ho ekipa, tamba durante tinan barak servisu ho di’ak, nune’e husu ba funsionáriu hotu atu servisu hamutuk hodi atinje metas ne’ebé iha, tanba hanesan diretór foun la’o mesak labele.
“Ha’u nafatin husu ita-boot sira-nia kolaborasaun, tamba ha’u Rui mesak sei la halo buat ida,” Hateten Rui.
Entretantu iha serimónia solene ne’ebé hala’o iha salaun Edukasaun munisipiu Covalima ne’e hetan partisipasaun husi Administradór munisípiu Covalima, Padre Parókia, no diretór eskola sira hotu iha Covalima.(*)
