Tempotimor (Covalima) Tuir Sekretáriu Administrasaun Munisípiu Covalima, Afonso Nogeira Nahack katak, Orsamentu Jerál Estadu (OJE) ba tinan 2022, munisípiu Covalima hetan de’it tokon $3,652.651 hodi aloka ba postu administrativu hitu no diresaun servisu munisipál nian.
“Diresaun iha munisípiu Covalima 18 no postu administrativu hitu no orsamentu hirak ne’e koloka kada postu no diresaun sira ne’e la to’o, tanba ne’e ita sei tau iha adisional hodi halo submisaun iha dia 6 ka dia 7 agustu depois dia 13, administradór munisípiu ba aprezenta orsamentu ne’e iha Ministériu Administrasaun Estatál (MAE),” Dehan nia ba www.tempotimor.com iha nia servisu fatin, Kinta (29/07).
Nia afirma, diresaun servisu munisipal no postu administrativu kontinua halo diskusaun, tanba kada postu no diresaun sira seidauk hatene atu aloka orsamentu hira.
“Ne’ebé ohin la hotu sei kontinua halo diskusaun, tanba importante liu mak saláriu ba funsionáriu permanente, funsionariu ajente administrasaun públika no ita-nia kazuais sira, ne’e tenke preve uluk, depois tau importánsia ba programa merenda eskolar no orsamentu ba suku sira,” nia tenik.
Nia afirma, komparasaun orsamentu tinan fiskál 2022 nian ho orsamnetu ba tinan fiskál 2021, tinan ne’e nian boot liu fali tinan oin.(*)
